የገንዘብና ኢኮኖሚ ትብብር ሚኒስትር ዴኤታ አማካሪ በቁጥጥር ሥር ውለው ፍርድ ቤት ቀረቡ – ታምሩ ጽጌ

ሳተናው
By ሳተናው September 13, 2017 06:58

  • 10.5 ሚሊዮን ብር ጉዳት በማድረስ ተጠርጥረዋል
  • የእነ አቶ ዓለማየሁ ጉጆ የምርመራ ሒደት ተጠናቀቀ

የገንዘብና ኢኮኖሚ ትብብር ሚኒስቴር የፋይናንስና አስተዳደር ጉዳዮች ሚኒስትር ዴኤታ አማካሪ አቶ ደጉ ላቀው፣ ጳጉሜን 3 ቀን 2009 ዓ.ም. በቁጥጥር ሥር ውለው መስከረም 2 ቀን 2010 ዓ.ም. ፍርድ ቤት ቀረቡ፡፡

የፌዴራል ፖሊስ ወንጀል ምርመራ ቡድን ተጠርጣሪውን በፌዴራል ከፍተኛ ፍርድ ቤት ልዩ ምድብ  ተረኛ ችሎት አቅርቦ እንዳስረዳው፣ ተጠርጣሪው በሚኒስቴሩ የፋይናንስና አስተዳደር ጉዳዮች ሚኒስትር ዴኤታ አማካሪ ናቸው፡፡ ግለሰቡ ትራንስናሽናል ኮምፒዩተር ቴክኖሎጂ ኃላፊነቱ የተወሰነ የግል ማኅበር፣ ከሚኒስቴር መሥሪያ ቤቱ ጋር ያለውን የሥራ ውል እንዳቋረጠ እያወቁ ስምንት ተሽከርካሪዎች ከቀረጥ ነፃ እንዲገቡ ማድረጋቸውን መርማሪ ቡድኑ አስረድቷል፡፡

አቶ ደጉ ከድርጅቱ ጋር በጥቅም በመመሳጠር ተሽከርካሪዎቹ እንዲገቡ በማድረጋቸው፣ መንግሥት ከቀረጥ ሊያገኝ ይችል የነበረውን ከ10.5 ሚሊዮን ብር በላይ እንዲያጣ ማድረጋቸውን መርማሪ ቡድኑ ለፍርድ ቤቱ አስረድቷል፡፡

በመሆኑም ተጠርጣሪው በእነ አቶ ዓለማየሁ ጉጆ የምርመራ መዝገብ 17ኛ ተጠርጣሪ ሆነው እንዲካተቱለት ፍርድ ቤቱን ከጠየቀ በኋላ፣ በተጠርጣሪው ላይ ቀሪ ምርመራዎች እንዳሉት በመጥቀስ 14 ቀናት ተጨማሪ ጊዜ ጠይቋል፡፡

ፍርድ ቤቱ አማካሪው የተጠረጠሩበትን የጉዳት መጠን ያወቁት ከምርመራው ውጤት ስለመሆኑና አለመሆኑን መርማሪ ቡድኑን ጠይቆት፣ የአቶ ደጉ የወንጀል ተሳትፎ የተገኘው ከሌሎቹ ተጠርጣሪዎች የምርመራ ውጤት መሆኑን አስረድቷል፡፡

መርማሪ ቡድኑ በተመሳሳይ የምርመራ መዝገብ ከወር በፊት በቁጥጥር ሥር ውለው በምርምራ ላይ ያሉትን የገንዘብና ኢኮኖሚ ትብብር ሚኒስትር ዴኤታ አቶ ዓለማየሁ ጉጆን ጨምሮ፣ በ16 ተጠርጣሪዎች ላይ ምርመራውን አጠናቆ የምርመራ መዝገቡን ለዓቃቤ ሕግ ማስረከቡን አስታውቋል፡፡

ፍርድ ቤቱ የምርመራ መዝገቡ ለጠቅላይ ዓቃቤ ሕግ መድረስ አለመድረሱን ተወክለው ከቀረቡት ዓቃቤ ሕግ አቶ ሰይፉ ገብር አረጋግጧል፡፡ ዓቃቤ ሕጉ ለፍርድ ቤቱ እንዳስረዱት የምርመራ መዝገቡ ለተቋሙ መድረሱን ሰምተዋል፡፡ የምርመራ መዝገቡ እንደሚያስረዳው ደርሷል የተባለው ወንጀል ከ500 ሚሊዮን ብር በላይ የሚገመት ጉዳት በመሆኑና ከአሥር ዓመታት በላይ ሊያስቀጣ እንደሚችል በመግለጽ ዋስትና እንደሚቃወሙ ተናግረዋል፡፡ ክስ የሚመሠረትባቸው ተቋማትን ጨምሮ 19 በመሆናቸውና ሰፊና ጊዜ የሚጠይቅ በመሆኑ፣ ሕጉ የሚፈቅደውን ሙሉ 15 ቀናት እንዲፈቀድላቸው አመልክተዋል፡፡

ፍርድ ቤቱ በሰጠው ትዕዛዝ በተጠረጠሩበት የወንጀል ድርጊት ለመጀመርያ ጊዜ የቀረቡት የፋይናንስና አስተዳደር ጉዳዮች አማካሪ አቶ ደጉ ላቀው፣ የተጠረጠሩበት ድርጊት ቀደም ብለው በቁጥጥር ሥር በዋሉት ተጠርጣሪዎች የምርመራ ውጤት የተገኘ በመሆኑ፣ መርማሪ ቡድኑ ምርመራውን ቀጥሎ ዓቃቤ ሕግ በሌሎች ተከሳሾች ላይ ከሚያቀርበው ክስ ጋር የእሳቸውንም አካቶ እንዲያቀርብ አሳስቧል፡፡

ክስ ለመመሥረት ዓቃቤ ሕግ 15 ቀናትን የጠየቀ ቢሆንም 11 ቀናት በቂ መሆኑን በመግለጽ መስከረም 12 ቀን 2010 ዓ.ም. ክስ እንዲመሠረት ፍርድ ቤቱ ትዕዛዝ ሰጥቷል፡፡

ታምሩ ጽጌ/ሪፖርተር

ሳተናው
By ሳተናው September 13, 2017 06:58
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment

Your e-mail address will not be published.
Required fields are marked*

Subscribe to Our Newsletter

ሳተናው ሰበር ዜና - ማወቅ መብትዎ ነው!







Archives