ክቡር ሚኒስትሩን ሊወስድ ሾፌራቸው ቤታቸው መጥቷል

Woyane oo

  • ደህና አደርክ?

[ዝም]

  • ምን ሆነሃል?

[ዝም]

  • አንተን አይደል እንዴ የማናግረው?

[ዝም]

  • ምን ይዘጋሃል?
  • ማውራት አልችልም ክቡር ሚኒስትር፡፡
  • ለምን አታወራም?
  • በጣም ርቦኛል፡፡
  • ቁርስ አልበላህም?
  • ምግበ ከበላው ቆየሁ፡፡
  • ፆም አለ እንዴ አሁን?
  • አዎን፡፡
  • ምን የሚሉት ፆም?
  • የግዴታ ፆም፡፡
  • የምን ፆም ነው ደግሞ እሱ?
  • ችጋር በግድ እያፆመኝ ነው፡፡
  • ምንድን ነው የምታወራው?
  • እርስዎ አይገባዎትም ክቡር ሚኒስትር?
  • ምኑ ነው የማይገባኝ?
  • ውስጤ ቆስሏል?
  • ለምን ታዲያ በአልኮል አትጠርገውም?
  • እንደ እርስዎ ውስኪ የምራጭበት አቅም የለኝማ፡፡
  • ታዲያ በውኃ መጥረግ ነዋ፡፡
  • እሱን ማድረግ እንዳንችል አደረጋችሁን፡፡
  • እንዴት ሆኖ?
  • ውኃ ከተቋረጠብኝ እኮ ስንት ቀኔ?
  • ለምን?
  • ምን ነካዎት ክቡር ሚኒስትር ውኃ እኮ የሚመጣልኝ በወረፋ ነው?
  • እ…
  • ክቡር ሚኒስትር በጣም ከፍቶኛል፡፡
  • ከፋይ ልበሳ፡፡
  • ክቡር ሚኒስትር እኔ ብቻ ሳልሆን ሕዝቡም በጣም ከፍቶታል፡፡
  • ከሕዝቡ ጋር አብራችሁ ከፋይ ልበሱዋ፡፡
  • ክቡር ሚኒስትር ከዚህ በኋላ እንደዚህ እያላገጡ የሚቀጥሉ አይመስለኝም፡፡
  • ምን ሆንኩ ነው የምትለው?
  • ክቡር ሚኒስትር ባለፈው የኮንዶሚኒየም ቤት እንደደረሰኝ ያውቃሉ?
  • ታዲያ መንግሥት ከዚህ በላይ ምን እንዲያደርግልህ ትፈልጋለህ?
  • እስቲ አይቸኩሉ፡፡
  • ምን ልትለኝ ነው?
  • ከስንት ዘመድ አዝማድ ተበድሬ ከፍዬ ቤት ውስጥ ገባሁ፡፡
  • እና ምን ትፈልጋለህ?
  • ውኃ የለው፣ መብራት የለው፡፡
  • ለምን?
  • እንደምንም ብዬ መብራት በአካባቢው ካለ የብሎኬት ማምረቻ አስገባው፡፡
  • እሺ፡፡
  • ከዛ በኋላ ግን ሆን ተብሎ ትራንስፎርመሩ ላይ ኃይል ተለቆበት ይኸው መብራት ካጣሁ ወራት ተቆጠሩ፡፡
  • ሆን ተብሎ መቃጠሉን በምን አወቅክ?
  • መብራት ኃይል ውስጥ የሚሠሩ ሠራተኞች ነው የነገሩኝ፡፡
  • ለምን ታምናቸዋለህ?
  • የሚያሳዝነኝ መንግሥት ለራሱ ፕሮፖጋንዳ በቲቪ ስለተሰጠን ዕድል አስወርቶ ዜና ከሠራብን በኋላ መብራቱን አጥፍቶ ጨለማ ውስጥ መቅረቴ ነው፡፡
  • ቴሌቪዥናችንማ ልማት ብቻ ነው የሚያሠራጨው፡፡
  • ክቡር ሚኒስትር በጣም የተቃጠልኩትም በዚህ ጣቢያ ነው፡፡
  • ለምን?
  • ጨለማውን ለመሸሽ ግሮሰሪ አረቄ ስጠጣ ትናንትና የእርስዎ ጓደኞች የሚያወሩትን ሰምቼ በጣም ተበሳጨሁ፡፡
  • ለምንድን ነው የተበሳጨኸው?
  • እነሱን እንደዚያ ሲሆኑ ማየት አልፈልግም፡፡
  • ምን ሲሆኑ?
  • ሲመጻደቁ!

[ክቡር ሚኒስትሩ በጣም ተናደው ቢሯቸው ሲገቡ አማካሪያቸውን አገኙት]

  • ምን ሆነዋል ክቡር ሚኒስትር የተናደዱ ይመስላሉ?
  • ለምን አልናደድ?
  • ምን አናደደዎት?
  • የማያናድድ ምን ነገር አለ ብለህ ነው?
  • ነገሮች ያናድዳሉ አይደል ክቡር ሚኒስትር?
  • በጣም ያናድዳሉ እንጂ፡፡
  • ክቡር ሚኒስትር ሕዝቡ ለምን እንደሚናደድ እየገባዎት ነው ማለት ነው?
  • ሕዝቡ ራሱ ያናድዳል አይደል እንዴ?
  • እኔ እኮ ስለሕዝብ የሚያወሩ መስሎኝ ነበር፡፡
  • ስማ ሕዝብ ምንም ብታደርግለት አያመሰግንም፡፡
  • እንዴት ማለት?
  • ይኸው ሾፌሬ መንግሥት ቤት ቢሰጠውም አሁንም ማማረሩን አልተወም፡፡
  • ለዛ ነው የተናደዱት?
  • አዎን እንደዚህ ዓይነቱን ፀረ ልማት ግለሰብ ማባረር ነው፡፡
  • ኧረ ክቡር ሚኒስትር መባረር ያለበትማ ሌላው ነው፡፡
  • ሌላው ማን?
  • ከፍተኛ ኃላፊውና ኪራይ ሰብሳቢው ነዋ፡፡
  • ስማ ኢሕአዴግ ለሕዝቡ ምን ያላደረገው ነገር አለ?
  • እንዴ ምን አደረገ?
  • ይኸው የብሔር ብሔረሰቦች መብት አስከብሮ አይደል እንዴ?
  • ክቡር ሚኒስትር እናንተ የተገበራችሁት የብሔር ብሔረሰቦች መብት እኮ በደርግ ጊዜ በተጠና ጥናት መሠረት ነው፡፡
  • ምን?
  • ክቡር ሚኒስትር ይኼ በታሪክ ያለ እውነተኛ ነገር ነው፡፡
  • እሺ ቆይ አሁን እኛ ለሕዝቡ ይኸው ኃይል እያመረትን አይደል እንዴ?
  • የምን ኃይል?
  • ለምሳሌ የህዳሴ ግድቡን እኛ አይደል እንዴ የገነባነው?
  • ክቡር ሚኒስትር እንዳይሳሳቱ፡፡
  • ደግሞ እሱን ንጉሡ ነው በመጀመሪያ ያሰቡት እንዳትለኝ?
  • አልተሳሳቱም ክቡር ሚኒስትር፡፡
  • ምን?
  • የህዳሴ ግድቡ ጥናት የተጀመረው እኮ በንጉሡ ዘመን ነው፡፡
  • ነገርኩህ ሕዝቡ ምስጋና አያውቅም፡፡
  • ክቡር ሚኒስትር እኔ እውነታውን ነው የነገርኩዎት፡፡
  • ስማ ለሕዝቡ ወርቅ ብታነጥፍለት ፋንድያ ነው የሚልህ፡፡
  • ይሄም አባባል እኮ በደርግ ጊዜ ነው የተባለው፡፡
  • እኔ ጠፋሁ?
  • ምነው ክቡር ሚኒስትር?
  • እንዴ ሁሉም ነገር በቀድሞ ሥርዓት ነው የተሠራው እያልከኝ ነው?
  • አልወጣኝም፡፡
  • ይኸው የ11 በመቶ ዕድገት እያስመዘገብን አይደል እንዴ?
  • ይኼ መመጻደቅ ነው እኮ ሕዝቡን የሚያስቆጣው፡፡
  • ይህቺ መመጻደቅ የምትለውን ቃል ከየት ነው የመዘዛችኋት ደግሞ?
  • ድርጊታችሁ ነዋ ያስመዘዛት፡፡
  • ቆይ እሺ አሁን ኢሕአዴግ ባቡር አልሠራም፡፡
  • እሱም ቢሆን በሚሊኒክ ጊዜ ኢትዮጵያ ነበራት፡፡
  • እ…
  • ክቡር ሚኒስትር እስቲ ምን አዲስ ነገር አምጥተናል ብላችሁ ራሳችሁን ጠይቁ፡፡
  • ምን አልከኝ?
  • ክቡር ሚኒስትር ምን ሠርታችኋል እስቲ?
  • ምንም አልሠራችሁም እያልከኝ ነው?
  • እሱማ ሠርታችኋል፡፡
  • ለሕዝቡ ካልሠራን ለማን ነው የሠራነው?
  • ለራሳችሁ!

[ክቡር ሚኒስትሩ ቤታቸው ምሳ እየበሉ ከልጃቸው ጋር እያወሩ ነው]

  • ዳዲ፡፡
  • አቤት ልጄ፡፡
  • ምን እየሆነ ነው?
  • የት ልጄ?
  • አገሪቷ ውስጥ ነዋ ዳዲ፡፡
  • ምን ሆነ ልጄ?
  • ኦሮሞና አማራ ክልል ተበጥብጧል፡፡
  • እ…
  • በየቦታው እስር ቤት ይቃጠላል፡፡
  • የት ነው የሰማሽው?
  • ይኸው ፌስቡክ ላይ ነዋ፡፡
  • ኢቢሲ ብቻ ተከታተይ አላልኩሽም?
  • ለምን ዳዲ?
  • ፌስቡክ የፀረ ልማቶች ነው፡፡
  • ተው እንጂ ዳዲ፡፡
  • ነገርኩሽ የፀረ ልማት ሚዲያውን ትተሽ ልማታዊ የሆነውን ኢቢሲ ተከታተይ፡፡
  • ዳዲ ምንም አልገባህም፡፡
  • እንዴት?
  • ሕዝቡ እኮ ትክክለኛ ጥያቄ ነው እያነሳ ያለው፡፡
  • ምን?
  • እንደ ባለሥልጣን የሕዝቡን ጥያቄ ሰምቶ መመለስ ነው የሚያዋጣው፡፡
  • ልጄ ኢሕአዴግ እኮ ብዙ ነገር ሠርቷል፡፡
  • እስቲ ምን ሠርቷል?
  • አየሽ በደርግ ጊዜ ሕዝብ ታፍኖ ነበር የሚኖረው፡፡
  • እ…
  • እንዳለኩሽ በደርግ ዘመን የግሉ ዘረፍ አልተነቃቃም ነበር፡፡
  • ደርግ ምንድን ነው?
  • አየሽ የዘመኑ ልጆች የማንበብ ችግር ስላለባችሁ ታሪክ አታውቁም፡፡
  • ስማ ዳዲ እኔ እንኳን በደንብ አነባለሁ፡፡
  • ታዲያ ለምንድን ነው ደርግ ምንድን ነው ብለሽ የምትጠይቂኝ?
  • ራሳችሁን ከደርግ ጋር እያወዳደራችሁ መመጻደቁ ተገቢ ስላልመሰለኝ ነው፡፡
  • ምን?
  • ለምን ራሳችሁን ከሠለጠኑት አገሮች አገዛዞች ጋር አታወዳድሩም?
  • እ…
  • ደርግን እኮ እኔ አላውቀውም፡፡
  • ስለማታነቢ ነዋ፡፡
  • ስለማላነብ ሳይሆን ማወቅ የምፈልገው ስለአደጉትና ከእኛ ስለሚሻሉት አገሮች ነው፡፡
  • እ…
  • እና ራሳችሁን ከደርግ ጋር እያወዳደራችሁ ከመመጻደቅ፣ ሌሎች የሠለጠኑ የአፍሪካ መሪዎችና የምዕራባዊያን አገሮች መሪዎችን ተመልክታችሁ ሕዝቡን ብትመሩት ጥሩ ይመስለኛል፡፡
  • ምን አልሽኝ ልጄ?
  • ለማንኛውም ሕዝብ በአስተሳሰቡ በጣም ቀድሟችኋል፡፡
  • እንዴት?
  • እናንተ የምታስቡት በኪሎ ባይት ነው፡፡
  • ሕዝቡ የሚያስበውስ?
  • በቴራ ባይት! ነው፡፡

[ክቡር ሚኒስትሩ ቀድሞ ሚኒስትር የነበሩ ባለሥልጣን ጋር ደወሉ]

  • እንዴት ነዎት ክቡር ሚኒስትር?
  • እንዴት ነህ ወዳጄ?
  • ምንም አልልም፡፡
  • ኧረ እንቅልፍ እምቢ አለኝ ባክህ?
  • የእንቅልፍ ኪኒን ውሰዱዋ ክቡር ሚኒስትር፡፡
  • በኪኒኑ ራሱ እንቅልፍ አልወስድ አለኝ እኮ፡፡
  • ምን ሆነዋል?
  • የአገሪቷ ሁኔታ እያስነጨቀኝ ነው፡፡
  • ምን ያስጨንቆታል?
  • ያው አገሪቷ ውስጥ ብዙ ኢንቨስትመንት ሲኖርህ የፀጥታው ጉዳይ ያስጨንቅሃል፡፡
  • አገሪቷ ምንም አትሆንም፡፡
  • አንተም ከእኔ ባትበልጥም አገሪቷ ውስጥ እኮ በርካታ ኢንቨስትመንት አለህ፡፡
  • እሱማ በሚገባ ነው ያለኝ፡፡
  • ስማ በቃ ፎቄ ሲቃጠል፣ ፋብሪካዬ ሲቃጠል ነው የሚታየኝ፡፡
  • ኧረ አይጨነቁ ማን ደፍሮ ነው የእርስዎን ንብረት የሚያቃጥለው፡፡
  • ከእሱ ባለፈ የሚያስጨንቀኝ ሌላ ነገር ነው፡፡
  • ምንድን ነው የሚያስጨንቅዎት?
  • ከሥልጣን እንዳልባረር?
  • ማን ሲባረር አይተው ያውቃሉ?
  • እሱስ እውነትህን ነው፤ ማንም ተባሮ አያውቅም፡፡
  • እኔ እንደዛ ሙሰኛ ሆኜ፣ ይኸው አማካሪ ተደርጌ ነው እኮ የተሾሙኩት፡፡
  • እኔንም አማካሪ አድርገው ይሾሙኛል ብለህ ታስባለህ?
  • ሌላ ታዲያ ምን ይሆናሉ?
  • የአማካሪው ቦታ ሞልቷል ብዬ ነው፡፡
  • ለእርሱ አያስቡ እኔ እሾሞታለሁ፡፡
  • አንተ ራስህ አማካሪ ነህ እኮ፡፡
  • እኮ የእኔ አማካሪ ይሆናሉ፡፡
  • የአማካሪ አማካሪ?
  • አዎን እኔ እኮ ከክቡር ሚኒስትርነት የተቀየርኩት ወደ ክቡር አማካሪነት ነው፡፡
  • እኔስ ምን ልባል ነው?
  • የክቡር አማካሪ…
  • እ…
  • ክቡር አማካሪ!

 

በጋዜጣዉ ሪፓርተር

 

 

LEAVE A REPLY

Please enter your comment!
Please enter your name here

This site uses Akismet to reduce spam. Learn how your comment data is processed.