ሰበር ዜና: ሕወሓት መራሹ መንግስት ዘንድሮ በአ.አ. መስቀል አደባባይና በጎንደር መስቀል እንዳይከበር ሊያደርግ ነው

መስቀልን በየቤተክርስቲያናችሁ አክብሩ የሚል ትዕዛዝ ወርዷል

14317539_-satenaw-news-6በሕዝባዊ ንቅናቄና አልገዛም ባይነት ጭንቅ ውስጥ የወደቀው የትግራይ ነጻ አውጪ መንግስት በዚህ አጣብቂኝ ሰዓት ተማሪዎች ወደ ትምህርት ገበታቸው ከተመለሱ ተቃውሞው ይጧጧፋል በሚል ስጋት ትምህርት እንዳጀመር አስተማሪዎችን በስልጠና ወጥሮ የያዘ ሲሆን በቀጣይ በአዲስ አበባ መስቀል አደባባይ እና በጎንደር በመስቀል በዓል የተነሳ ብዙ ሕዝብ ከተሰባሰበ ወደ ተቃውሞ ሊቀየር ይችላል በሚል ስጋት መስቀል በየቤተክርስቲያኑ እንዲከበር ትዕዛዝ መውረዱን አንድ ታማኝ የኢሕአዴግ የውስጥ ምንጭ ለዘ-ሐበሻ ገለጹ::

እንደምንጩ ገለጻ በፌደራል ጉዳዮች ሚ/ር አማካኝነት ለቤተክህነት ይህ መመሪያ የወረደ ሲሆን ቤተክህነት እስካሁን ምላሽ እንዳልሰጠች ገልጸዋል::

ምንጩ ለዘ-ሐበሻ እንዳሉት መንግስት የመስቀል በዓልን በአዲስ አበባ መስቀል አደባባይ እና በጎንደር ብዙ ሺህ ሕዝብ በተሰበሰበት እንዳይከበር ማዘዙን ሚዲያዎች ተቀባብለው ከዘገቡትና ሕዝቡም ይህን ካወቀ ምናልባት አቋሙን ሊቀይር ስለሚችል ይህን ዜና ሕዝብ እንዲቀባበለውና ላልሰማ እንዲያሰማ ጥሪያቸውን አቅርበዋል::

ከአባይ ጸሐዬ በኩል በፌደራል ጉዳዮች አማካኝነት የወረደው ይኸው ት ዕዛዝ እንደሚያመለክተው ሁሉም አብያተ ክርስቲያናት የዘንድሮውን የመስቀል በዓል ጸረሰላም ኃይሎች ሊያውኩት ስለሚችሉ በየቤተክርስቲያናችሁ አክብሩ የሚል ነው ያሉት እኚሁ ታማኝ ምንጭ ስርዓቱ በአሁኑ ወቅት በገባበት ፍርሃት የተነሳ ከዚህም ሌላ ውሳኔ ሊያሳልፍ ይችላል ብለዋል::

የመስቀል በዓል በአዲስ አበባ መስቀል አደባባይ እንዲሁም በጎንደር በብዛት ከሚከበርባቸው ቦታዎች መካከል የሚጠቀስ ሲሆን በተለይ በነዚህ ቦታዎች ብዙ ሺህ ሕዝብ መገኘታቸው ለመንግስት እንቅልፍ የነሳው ጉዳይ ነው::