ኢሳት ቴሌቪዥን ጣቢያ ከመላዉ ኢትዮጵያ አንድነት ድርጅት (መኢአድ) አመራሮች ከፍተኛ ወቀሳ ደረሰበት [ሸንቁጥ አየለ]

ESATገና እንደተመሰረተ ኢሳት የመላዉ ኢትዮጵያ አንድነት ድርጅት (መኢአድ) የሚልክለትን መግለጫዎች ሁሉ ወደጎን በመግፋት የሚታወቅ ነዉ ሲሉ የመኢአድ የህዝብ ግንኙነት ም/ሀላፊ ማብራሪያ ሰጥተዋል:: መኢአድ የሚልክለትን መግለጫዎች ሁሉ እያፈነ ወደ ቅርጫት ሲወረውር ከርሟል አሁንም ያንኑ ድርጊቱን አጠናክሮ ቀጥሏል ሲሉ የመኢአድ የህዝብ ግንኙነት ም/ሀላፊ አቶ ለገሰ ወ/ሃና በምሬት ኢሳትን ወቅሰዋል::

በሚያሳዝን እና በሚያሳፍር ሁኔታም የአማራ ህዝብ ተጋድሎ በመላዉ ጎጃም እና ጎንደር ሲቀጣጠል ደግሞ ወያኔ በዋናነት አሳዶ ለማጥፋት የተነሳዉ መኢአድን ነዉ:: እናም ኢሳት አሁን በመላዉ ኢትዮጵያ አንድነት ድርጅት (መኢአድ) ላይ ወያኔ ከፍተኛ ዘመቻ በማድረግ የድርጅቱን ፕሬዝዳንት አቶ ማሙሸት አማረን: የድርጅቱን የህዝብ ግንኙነት ም/ሀላፊ አቶ ለገሰን : እንዲሁም በርካታ አመራሮችን ወያኔ እያሳደዳቸዉ እንዳለ መግለጫ ሲላክለት አፍኖ የሚያስቀረዉ የመኢአድ ህልዉና መጥፋት እና መክሰም አለበት የሚል ዉሳኔ ላይ በመድረሱ ይመስላል ሲሉ አቶ ለገሰ ሰፊ ማብራሪያ ሰጥተዋል::

በቅርቡም ስለ ደራሲ ያሬድ ግርማ ሀይሌ (የመኢአድ የሠሜን ጎንደር አመራር) እንዲሁም ስለ አቶ አለምነህ ዋሴ (ከመአሕድ ጀምሮ የሠሜን ጎንደር ዙሪያ ወረዳ ሰብሳቢ) መታፈን መግለጫ ሲላክላቸዉ መግለጫዉን አፍነዉታል ሲሉ ገልጸዋል:: ወያኔ የመኢአድን አባላት እና አመራሮች ሲያፍን ኢሳት ደግሞ መኢአድ ላይ የሚደርሰዉን የግፍ በደል ያፍናል::በመላዉ አለም እንዲሁም በኢትዮጵያ ያለዉ ህዝብ ስለ መኢአድ ተጋድሎ መረጃ እንዳያገኝ ሆን ብሎ የምንልክለትን መረጃ ሁሉ ወደ ቅርጫት ይወረውረዋል ሲሉ አብራርተዋል::

ኢሳት ዙሪያ የተሰባሰቡ ሰዎች ምንነቱ በማይገባ ምክንያት መኢአድ ከስሟል: መኢአድ መንግስት ዘግቶታል የሚል ወሬ መንዛት እንደሚመርጡ የገለጹት የመኢአድ የህዝብ ግንኙነት ም/ሀላፊ አቶ ለገሰ መኢአድ ሱቅ በደረቴ አይደለም:: ወያኔ ሲፈልግ የሚዘጋዉ ወይም የሚከፍተዉ ድርጅት አይደለም:: መኢአድ ሲመሰረትም ወያኔ ስለፈቀደ አይደለም የተመሰረተዉ:: ኢትዮጵያዉያንን ከወያኔ ኢ-ዲሞክራሲያዊ አገዛዝ ነጻ ለማዉጣት የተቋቋመ ድርጅት ነዉ ሲሉ አብራርተዋል::

መኢአድ በደም እና በአላማ ተላቁጦ የተፈጠረ ድርጅት ነዉ:: መኢአድ በወጀብ እና በመከራ መሃከል ማለልፍ የለመደ: በደም ታሪክ ከሚጽፉ አባቶች አብራክ በተወለዱ ልጆች በጥልቅ መሰረት ላይ የቆመ ድርጅት መሆኑን ወያኔም ሆነ ኢሳት ይወቀዉ ሲሉ መራራ ብስጭታቸዉን ገልጸዋል::

መኢአድ ኢትዮጵያን ነጻ ሳያወጣ ማንም ሊያከስመዉ የሚችል ድርጅት አይደለም ሲሉም አብራርተዋል:: በተያያዥም በመኢአድ ላይ በኢሳት ዙሪያ ያሉ ሰዎች መኢአድ የአማራ ድርጅት ነዉ ስለዚህ መክሰም ያለበት ድርጅት ነዉ የሚል ወንጀለኛ ክስ እንደሚያቀርቡበት አቶ ለገሰ አብራርተዋል:: መኢአድ የመላዉ ኢትዮጵያዉያን ድርጅት መሆኑን የሚያረጋግጠዉ ግን መኢአድ በደቡብ ክልል ብቻ ከሶስት መቶ ሽህ አባላት በላይ አባላት ያፈራ ድርጅት መሆኑን ኢሳትም ሆነ ወያኔ ጠንቅቀዉ ያዉቃሉ::

ሌላዉ ቀርቶ መኢአድ የአማራ ድርጅት ነዉ ቢባል እንኳን ፍትሃዊ የሚዲያ ሽፋን እንዳናገኝ ኢሳት በኛ ላይ የመረረ ጥላቻ ለምን ሊኖረዉ እንደቻለ አናዉቅም ሲሉ በኢሳት አቋም ግራ መጋባታቸዉን ተናግረዋል:: ይሄን የተሳሳተ አቋማቸዉንም እንዲያርሙ ለኢሳት አመራሮች ጥሪያቸዉን አቅርበዋል::

አቶ ለገሰ አያይዘዉ ሲገልጹ “..,ትላንትና ጀምሮ አዲስ አበባ የሚገኙት አባሎቻችን ቤታቸው እየተከበበ ነው:: ለጊዜው ያላወቅናቸው አባላት ሣይታሰሩ አልቀሩም:: በርካታ የመኢአድ አባላት በመላ ሀገሪቱ እየታሰሩ ነዉ:: ከላይ እንዳልኩትም አቶ ማሙሸት አማረንም አገዛዙ ሊያስረው እየፈለገው ነው:: እኔም ስራየን ጥየ ተደብቄ ነው ያለሁት:: ይህንን እና የመሣሠሉ በደሎች እየደረሱብን መግለጫ እና መረጃ ስንልክላቸዉ ገና መኢአድ የሚል ቃል ሲያዩ መረጃዉን ወደ ቅርጫት ዉስጥ ይወረውሩታል ሲሉ አብራርተዋል::

ከኢትዮጵያ ህዝብ በሚሰበሰብ ገንዘብ ከተቋቋሙት ሚዲያዎች ማለትም ከእነ ኢሳት የሚዲያ ሽፋን ተነፍጎን: ወያኔም ልዩ መኢአድን የማጥፋት ወንጀል እየሰራብን ቢሆንም መኢአድ የነጻነት: የአንድነት እና የድል መንፈስን የታጠቀ ሀይል ነዉና ከህዝባችን ጎን ቆመን መራራ ተጋድሎ እያደረግን ነዉ ሲሉ አብራርተዋል:: መኢአድ መንፈስ መሆኑን ከጠላት እስከ ወዳጅ ይወቅ ሲሉም ቁርጥ ያለ አቋማቸዉን አስተላልፈዋል::

በተያያዥም የኢትዮጵያዉያን ተጋድሎ እስከ ነጻነትን የሚያስተባብሩ አመራሮችም ኢሳት የሚላክለትን ዜናዎች ወደ ጎን የመግፋት አባዜ እንደተጠናወተዉ አብራርተዋል:: እንዲሁም እንደ አቶ ለገሰ ሁሉ በምሬት ኢሳትን ወቅሰዋል::

LEAVE A REPLY

Please enter your comment!
Please enter your name here

This site uses Akismet to reduce spam. Learn how your comment data is processed.