በኢትዮጵያ እሰር ቤቶች ውስጥ የሚፈጸሙ ማሰቃያዎችን ታሳሪዎች እያጋለጡ ነው – በወንድወሰን ተክሉ

በኢትዮጵያ ውስጥ ባሉ እስር ቤቶች ውስጥ የሚፈጸሙትን አሰቃቂ የማሰቃያ ተግባሮችን የተሳሩት እሰረኞች ከተለያየ ስፍራ ሆነው ዛሬም እያጋለጡ መሆናቸውን የጀርመን ድምጽ የታሳሪዎችን ቃል ጠቅሶ ዘገበ።

በሀገር ውስጥ ባሉ እስር ቤቶች ከተራው ፖሊስ ጣቢያ ጀምሮ በወንጀል ምርመራ፣በማእከላዊ እና ብሎም በማረሚያ ቤቶች እንደ ቂሊንጦ፣ቃሊቲና ዝዋይ ቤቶች ውስጥ ባሉ የፖለቲካ ነክ በህኑ እስረኞች ላይ የሚፈጸመው የማሰቃያ ተግባራትን ሰለባ የሆኑት እስረኞች በተንገሸገሸ አገላለጽ ለራዲዮው የገለጹ ሲሆን ድርጊቱንም “በአንድ የሀገር ዜጋ ላይ ቀርቶ በባእድ ጠላት ላይ እንካን የማይፈጸም ኢ-ሰብዓዊ ጭካኔ ነው” ሲሉ ገልጸውታል።

ዓለም አቀፍ የሰብዓዊ መብት ተማጋቾች አምነስቲ ኢንተርናሽናልና ሂውማን ራይትስ ዎች [Amnesty International & Human Rights Watch ]በኢትዮጵያ መንግስት በእስር ቤቶች ውስጥ የሚፈጸሙትን ኢ-ሰብዓዊ የሆነን የማሰቃያ ተግባራቶችን በተከታታይ በሚያወጣቸው ዓመታዊና ወርሃዊ መግለጫዎች ላይ እየገለጹት ያለ ገሀዳዊ ተግባር መሆኑ ይታወቃል።

በማእከላዊ እስር ቤት ውስጥ በህወሃቶች 84 ተብሎ በሚጠራው የጨለማ ክፍል ለዓመት ሲሰቃይ የነበረና ዛሬ በስደት ያለው ቤኛ ገመዳ የደረሰበትን “ያልሰራሁትን ሰርቻለሁ ብዪ እንዳምን በኤሌክትሪክ ገመድ በሚያሰቅቅ ሁኔታ ተገርፌያለሁ።የእግር ጣት ጥፍሮቼን እየነቀሉ አሰቃይተውኛል።ከለሊት ሰባት ሰዓት እስከ ንጋት አስራ አንድ ሰዓት አራት መርማሪዎች እየተፈራረቁ ማንነቴን እስክጠላና ሞት እስከምመኝ ድረስ አሰቃይተውኛል” ሲል ይናገራል።

በኢትዮጵያ እስር ቤቶች ውስጥ የሚፈጸሙትን አሰቃቂ ተግባራትን ቤኛ ገመዳ በመግለጽ የመጀመሪያም ሆነ የመጨረሻው እንዳልሆነ ካለን ተጨባጭ ማስረጃዎች አንጻር መናገር ይቻላል።

በጎንደር እስር ቤት ለሁለት ዓመታት ያህል ሽፍታና ሌባ ታደራጀለህ በሚል ክስ ተጠርጥሮ ታስሮ የነበረው ወገኑ ማስረሻ በአዲስ አበባው ማእከላዊ እስር ቤት ከተሰቃየው ቤኛ ገመዳን በሚጋራ መልኩ የደረሰበትን “መርማሪዎቹ እኔ የአግ7 እና በግንደር አከባቢ የሚንቀሳቀሱትን ሽፍቶች አደራጅቻለሁ ብዪ እንዳምን እራሴን እስክስት አሰቃቂ ድብደባና ግርፋቶች ተፈጽሞብኛል” ሲል ተናግራል።

ቤኛ ገመዳ በኦ.ነ.ግ ተጠርጥሮ ከጋምቤላ ተይዞ በማእከላዊና ቂሊንጦ ከ2011-2015የተሰቃየ እስረኛ ሲሆን የጎንደር ሰሜን አርማጭሆ ተወላጅ የሆነው ወገኑ ማስረሻም ከሁለት አሰቃቂ የእስር ዓመታት በሃላ ሲፈታ ትዳሩ ፈርሶና ልጆቹን አጥቶ ዛሬ በጎንደር ከህዝቡ ጋር በአግባቡ መግባባት በማይችልበት ደረጃ ተግልልሎ ለመኖር የተገደደ ሰው እንደሆነ ለማወቅ ተችላል።

ከሰሜን ጎንደር ሳንወጣ በወልቃይት የማንነት ጥያቄ ዙሪያ ከ7ዓመታት በላይ መጀመሪያ በጎንደር እስር ቤት ቀጥሎም በአዲስ አበባው ማእከላዊ ምርመራና በቂሊንጦ የተሰቃዪ በርካታ ተጠርጣሪዎች በእስር ቆይታቸው የደረሰባቸውን አካላዊና አእምሮአዊ ጠባሳን ዛሬም በሚያሰቅቅ ሁኔታ ላይ ሆነው ገልጸዋል። ድብደባ፣የተለያዩ የማሰቃያ ተግባራቶች፣ክብርና ሞራል ነክ ተግባራት እንደተፈጸሙባቸው ሳይሸሽጉ ገልጸዋል።

ወጣቱ እስረኛና ከወራቶች በፊት ለህክምና ወደ አሜሪካ የተጋዘው ሀብታሙ አያሌው የሁለት ዓመት አሰቃቂ የማእከላዊ ቆይታውን ምስክረነት ቃል ለቪ.ኦ.ኤ ቀጥሎም ለተለያዩ ዜና ጣቢያዎች ይፋ ካደረገ በሃላ በርካታ ታሳሪ የነበሩና ዛሬም በእስር ያሉ እስረኞች በይፋ እየተናገሩ ሲሆን በመንግስት በኩል ተጠያቂነቱን በተመለከተ መልስ ለመስጠት ፍቃደኛ ሆኖ የሚመልስ ሳይሆን በዝምታ ሽሽት ሲያልፈው ፍርድ ቤቶች ደግሞ በተከታታይ ለሚሰሙት የእስረኞቹ አቤቱታ መልስ ባለመስጠት ዝምታ የሚያልፉት ክስተት እንደሆነም ማወቅ ተችላል።

አሰቃቂዎቹ የእስር ቤት ማሰቃያ ታሪኮች በፖሊስ ጣቢያ፣በወንጀል ምርመራና በማእከላዊ ብቻ ተወሰኖ የቀረ ሳይሆን ጉዳያቸው በፍርድ ቤት ደረጃ ላይ ያለና ብሎም ፍርደኞች የሆኑ እስረኞች ቆይታ በሚያደርጉበት የቃሊቲ፣የቂሊንጦ፣የዝዋይና የተለያዩ ማረሚያ ቤቶች ውስጥም በተመሳሳይ ሁኔታ እየተወሰደ ያለ ድርጊት ሲሆን ማረሚያ ቤቶቹ የፍርድ ቤት ትእዛዝ አክባሪ አለመሆናቸውን ጨምሮ ሁኔታቸውን አስከፊ እንዳደረገው ከእስር ቤት ከሚደመጡት ታሪኮች ማወቅ ይቻላል።

የገዢው ፓርቲ ኢ.ህ.አ.ዴ.ግ ከማርቀቅ እስከ ማስጸደቅ ድረስ በመስራት እየተጠቀመበት ያለው የሀገሪታ ሕገ-መንግስት በማንኛውም ሰው ላይ የጉልበት እርምጃ፣ድብደባና የማሰቃያ ስልቶችን በመጠቀም ተጠርጣሪን ቃል መቀበል ሕገ-ወጥ ነው ብሎ የደነገገ ቢሆንም መንግስት ግን በእስረኞች ላይ ሕገ-መንግስታዊ መብታቸውን እና ደንብን በመጣስ የሚያደርሰው በደልና ስቃይ እንደቀጠለ መሆኑ ይታወቃል።

 

 

LEAVE A REPLY

Please enter your comment!
Please enter your name here

This site uses Akismet to reduce spam. Learn how your comment data is processed.