የሰሜን ሽዋው አንኮበር ታሪክ አድማቂ ጌጦች አልዩ አምባ እና አብዱል ረሱል

ባህር ዳር፡
መጋቢት 11/2010 ዓ/ም

(አብመድ) አልዩ አምባ ከአንኮበር ከተማ አሥራ ሁለት ኪሎ ሜትር ያህል ቁልቁል ሲወረዱ የምትገኝ ከተማ ናት
አልዩ አምባ የወደብ ከተማ በመሆኗ 4 በሮች እንደነበሯት የታሪክ አዋቂዎች ያስረዳሉ፡፡ የአካባቢው አዛውንቶች እንደሚያስረዱት ከሆነ አዋሽ እና ጨኖ ለታሪካዊቷ ስፍራ አልዩ አምባ በመግቢያ በርነት ሲያገለግሉ አንኮበር እና ምንጃር በር ደግሞ መውጫ በሮች በመሆን ለስፍራዋ ትልቅ ግልጋሎት ይሠጡ እንደነበር የታሪክ ገጾች ይናገራሉ፡፡
በወቅቱ የከተማዋ ነዋሪዎች የጦር መሳሪዎችን እና የተለያዩ ሸቀጣ ሸቀጦችን ወደ ሀገር ውስጥ ሲያስገቡ የዝሆን ጥርስ ፣ ቡና ፣ ወርቅ ፣ እና የመሳሰሉት ደግሞ ወደ ውጪ ይልኩም ነበር፡፡
ከመካከለኛው ዘመን ጀምሮ እስከ 20ኛው ክፍለ ዘመን መጀመሪያ ድረስ በኢትዮጵያ ታሪክ ጥንታዊ ከሚባሉት የቀረጥ ኬላዎችና የንግድ ማዕከሎች ሆና እንዳገለገለች እድሜ ሰጥቷቸው በወቅቱ የነበሩ ሰዎች እንደ አስረጅ ሆነው ይናገራሉ።

የፈረንሳይ ዲፕሎማት ሮቺ ሄሪኮርት እንደፃፈው እንደዛሬው ሳይሆን ያኔ ትራንስፖርት የሚሰጡት እንሳሳት ነበሩ ለዚህ ተግባርም ከ1500 እስከ 1700 የሚጠጉ ግመሎች የአገር ውስጥ ምርት ወደውጭ ያጓጉዙባት ነበር።

በ1834 ዓ.ም እና 1835 ዓ.ም በአገራችን የመጀመሪያ የሆነው የቀረጥ ውል የተፈረመውም በአልዩ አምባ ገበያ መሠረት ነው።

በከተማዋ ከፐርሽያ ( ኢራን) ፣ ከህንድና ከአረብ አገሮች የሚመጡ በርካታ የውጭ አገር ዜጎች ይኖሩባት እንደነበርም የተለያዩ ደራሲያን ጽፈውላታል።

ስልክም ወደ ኢትዮጵያ እንደገባ ከአጤ ምኒልክ ቤተ መንግሰት / አንኮበር / እስከ እቃ ግምጃ ቤታቸው መስመር ተዘርገቶ ንጉሱ ነበሩ ለመጀመሪያ ጊዜ የተነጋገሩበት ፡፡
ከዚም አልዩ አምባ ውስጥ ስልክ አምባ የምትባል አካባቢ የመጀመሪያው መስመር ተዘረጋ፡፡
ቀጥሎም ወደ ጨኖ እና ሌሎች አካባቢዎች ተስፋፋ በማለት የአካባቢው አዛውንቶች ይናገራሉ።
እነዚሁ አባቶች አልዩ አምባ የተዳከመችው የባቡር ሐዲድ በከተማዋ ማለፍ ባለመቻሉና ወደ ድሬደዋ በመዛወሩ መሆኑን ያስረዳሉ ።
ዛሬ የአልዩ አምባ ገበያ አብዛኛዎቹን አርጎባዎች ይዞ የአፋርንና አማራ ብሔረሰቦችን ያገናኛል።
አብዱል ረሱል ከ1285 እስከ 1415 ዓ.ም እንደተመሰረተች ይነገራል፡፡አካባቢው የወላስማ ስረወ መንግስት ግዛቱን ካስፋፋባቸው ስፍራዎች በቀዳሚነት ይጠቀሳል፡፡ ይህን ስያሜ ያገኘው አብዱል ናስር ከሚባሉ ሰው እንደሆነም የአካባቢው ነዋሪዎች ይገልፃሉ፡፡ አብዱል ረሱል ቀደም ባለው ጊዜ የባሪያ ንግድ የሚፈፀምበት ሲሆን ይህ ባሪያ የሚገበያዩበት እና የሚያጉሩበት /የሚያሳርፉበት/ ቦታ በአካባቢው ነዋሪዎች ተለይቶ ይታወቃል፡፡

Source- Amhara Mass Media Agency

LEAVE A REPLY

Please enter your comment!
Please enter your name here

This site uses Akismet to reduce spam. Learn how your comment data is processed.