በወያኔ የሬሣ ሣጥን የመጨረሻው ምስማር! (ይነጋል በላቸው)

ትግራይ ቲቪን ጨምሮ የትግራይ መገናኛ ብዙኃን እስካሁን ድረስ በብቸኝነት ይዘው የሚኩራሩበት፣ የትግራይ ተወያይ የህግና የማኅበራዊ ሣይንስ ‹ምሁራን› የሠልፈኛውን ብዛት ከ200 ሺህ አስበልጠው የገመቱበት (በመቀሌና አካባቢዋ ራሱ ይህን ያህል ሕዝብ ይኖር ይሆን?)፣ ወያኔዎች ለጊዜውም ቢሆን የሚኮፈሱበት፣ ትግራይኦንላይንና አይጋፎረም “the mother of rallies” በሚል በከፍተኛ ኩራት እየዘገቡት የሚገኘው፣ በተጋሩ አክቲቪቶች ምሥክርነት መሠረት የዓለም አቀፍ መገናኛ ብዙኃን እየተቀባበሉ “24 ሰዓት የሚያራግቡት” … ያለፈው ቅዳሜ የመቀሌ ሠልፍ ትናንት ማታ ለመሥራት ከ27 ዓመታት በላይ በወሰደ የወያኔ ኒኩሌር ቦምብ መመታቱን ማረጋገጥ ችያለሁ፡፡ ይህ የትናንቱ ክስተት በወያኔ ሬሣ ላይ የመጨረሻው ምስማር እንደሆነ መቁጠር የሚቻል ይመስለኛል፡፡ የወቅቱ የከተማችን ወግ እርሱ ብቻ ነው፡፡ ለወያኔ ትልቅ ኪሣራ ነው፡፡

ትናንት ማታ በዋልታና ፋና እንዲሁም በአማራና በኢቲቪ አንድ ዘጋቢ ፊልም ቀርቦ ነበር፡፡ በመሠረቱ እንዲህ ዓይነቱን ሰቅጣጭ ዝግጅት አለማየት ጥሩ ነበር፡፡ ግን የሀገር ነገር አያስችልምና እያዘንን፣ እያነባን፣ አንዳንዴም ዐይናችንን እየሸፈንን አየነው፡፡ ጓደኛሞች እየተደዋወልንና በሞባይል ስልኮች መልእክት እየተለዋወጥን “እንዲህ ያለውን ዝግጅት እያየህ/ሽ ነው?” በሚል የሰማን ላልሰማ አዳረስን፡፡ ይህን የወያኔ ኒኩሌር ቦምብና የሕዝብ ሰቆቃ ከሞላ ጎደል አብዛኛው የኢትዮጵያ ሕዝብ እንደሚመለከተው ግልጽ ነው፡፡ “ኒኩሌር ቦምብ” ለማለት የተገደድኩት ራሳቸውን በራሳቸው ለማጥፋት የሚያስችል ሁነኛ መሣሪያ ሊሆን የበቃውን ይህን ሁሉ ዘግናኝ ድርጊት ለመግለጽ ሌላ ቃል በማጣቴ ነው፡፡ የቆፈሩት ጉድጓድ እጅግ ራቀና በሚያሳዝን ሁኔታ እነሱና ደጋፊዎቻቸው ሲገቡበት ቁልጭ ብሎ ታየኝ፡፡ ትግራይ እንደሕዝብም እንደ ክ/ሀገርም ቆም ብላ ማሰብ ያለባት ጊዜ ላይ እንደደረሰች ለማስታወስ ወልይ ወይም ደብተራ መሆን አያስፈልግም፡፡ ለፖለቲካ ፍጆታ ሲባል የሚወራውን ሁሉ ለጊዜው እርሱት፡፡ ያ ዓይነቱ ከንቱ ስብከትና ፕሮፓጋንዳ ለሩዋንዳና ለሦርያም አልጠቀመም፡፡ እውነቱን እንጋፈጥና ከወዲሁ መፍትሔ የሚገኝ ከሆነ እንሞክር ይልቁንስ፡፡ “እንዲህ ብዬ ነበር”ም አይሠራም፡፡ አለባብሰን የምናልፈው ሁሉ በኋላ ለማስተካከል እንዳይቸግረን እሰጋለሁ፡፡ መስከረም አበራ የተባልሽ  መምህርትና አክቲቪት እግዜር ይስጥሽ፤ ትናንት ማታ በኢሳት ያልሽውን ሰምቻለሁ፡፡ እሷን እንስማት!

አሁን ምን ቀረ? ምንም፡፡ ሕወሓት ለዝግጅቱ ብዙ የደከመበት ሰልፍ አፈር በላ፡፡ እንደሰማነው በሰልፉ ዕለት በየሆቴሉና በየመዝናኛው የወያኔ ካድሬዎች እየዞሩ ከሆቴሎቹ የዘወትር የዕለት ገቢ ዕጥፍ በመክፈል ሕዝብ በነፃ እንዲስተናገድና ጠላቶቹን በጭርሆታት(በመፈክሮች) አፈር-ድሜ እንዲያስግጥ ለማድረግ ያፈሰሱት በብዙ ሚሊዮን የሚቆጠር የሀገራችን ገንዘብ አንድም ትርፍ ሳያስገኝ ውኃ በላው፡፡ ሠልፉ ያስገኘላቸው የተወሰነ ሥነ ልቦናዊ መኮፈስ የአንድ ሣምንት ዕድሜ እንኳን አግኝቶ ዳዴ ሳይል በአጭር ተቀጨ፤ የበረዶ ውኃ ፈሰሰበት፡፡ ወያኔ ላለፉት በተለይ 27 እና ባጠቃላይ ደግሞ 44 ዓመታት ሲደክምበት የነበረው ኒኩሌር ቦምብ ስኬታማ ሆኖለት ይሄውና ለተፃራሪዎቹ አሳልፎ በመስጠት ራሱ ላይ እንዲፈነዳ አደረገ ፡፡ ከዚህ በኋላ ወያኔ ሊያንሠራራ በሚችልበት አቋም ላይ አይደለም የሚገኘው፡፡ ቀባሪ ካልጠፋ በስተቀር ሞቷል ማለት ይቻላል፡፡፡፡

በዶ/ር ዐቢይ አገላለጽ ብልሁና አስተዋዩ ሲሳይ አጌና በቅርቡ በኢሳት የዕለታዊ ዝግጅት ላይ ሲናገር እንደሰማሁት ወያኔ ከቶውንም ቢሆን ከአሁን በኋላ ወደ አራት ኪሎ ሊመጣ አይችልም፡፡ የሚመጣ ከሆነ ግን እንደሲሳይ እኔም እላለሁ ሁላችንም ብንሞት ይሻለናል፡፡ ሞት ርስት ነው፡፡ እየተሰቃዩ ከመኖር ሞት ይሻላል፡፡

ወያኔ ሊነግሥና እንደቀደመው ጊዜ ጥሬ ብስናቱን ሊለቅብን የሚችለው መቶ ሚሊዮኑ የኢትዮጵያ ሕዝብ ሲያልቅ ብቻ ነው፡፡ ያ ደግሞ በዜሮና በዜሮ መካከል ያለ ዜሮ መቶኛ ዕድል ነው፡፡ መኖር የማይፈልግ የለምና፡፡

በትናንትናው ዘጋቢ ፊልም ያየናቸው ግፉኣን ወገኖች አባይን በጭልፋ ዓይነት ናቸው፡፡ ያለቀውን ትተን  በየቤቱ ቁስሉንና ጠባሳውን ደብቆ የሚኖረው የወያኔ የስቃይ ሰለባ የትዬለሌ ነው፡፡ እነዚህ ጭራቆች ያላደረጉን ነገር የለም፡፡ ልንረዳው የሚገባው ዐቢይ ነገር ግን በነዚህና በሌሎቹም ላይ የወረደው ስቃይ በነሱ ብቻ የወረደ ሳይሆን በኛም ጭምር እንደወረደ በመቁጠር ቁስላቸው እንዲጠዘጥዝን እኛን በነሱ ቦታ ተክተን ማየት ያለብን መሆኑን ነው፡፡ በዚያ ላይ እነዚህ ወገኖቻችን በወያኔ ያጡትን ነገር ሁሉ ዕጥፍ ድርብ አድርገን መመለስ ይኖርብናል፡፡ ሕይወታቸውንንና የጎደለ አካላቸውን መመለስ ባንችል የተቀሙትን ሀብት ንብረታቸውንና ገንዘባቸውን፣ መሬታቸውንና ክብራቸውን፣ ሥራቸውንና ደሞዛቸውን በአግባቡ መመለስ ግዴታችን ነው፡፡ ለዚህ ደግሞ ሕዝብና መንግሥት ነገ ዛሬ ሳይሉ ወደ ተግባር መግባት አለባቸው፡፡ እንዲህ ሲሆን ነው ለሀገርና ለሕዝብ መታገል ዋጋ ኖሮት “ለካንስ ሕዝብና መንግሥት የዜጎችን ልፋትና ድካም ያውቃሉ!” ሊባልና ትግል ከንቱ እንዳልሆነ ዜጎች ሊረዱ የሚችሉት፡፡ የነሱን መስዋዕትነት ዋጋ ላለማሳጣትም ከአሁን በኋላ በወያኔዎች ፈለግ መጓዝን ዕርም ማለት ይኖርብናል፡፡ በዜግነት እንጂ በብሔርና በጎሣ የምንከፋፈል ከሆነ በዜጎቻችን ደምና አጥንት እንደመቀለድ ነው፡፡ በዚህ ጠማማ መንገድ ተጉዞ ያለፈለትና የበለፀገ ሀገር ደግሞ የለም፡፡

ከወያኔ ጋር የሚደረገውን ትልቁን ጦርነት ራሱ ወያኔ እያከናወነልን ነው – በወገኖቻችን ስቃይ ማላገጥ ይሆንብኛል እንጂ በዚህ ሥራው ወያኔ ሊመሰገን ይገባው ነበር፡፡ እንደዚህ ያሉ ዝግጅቶች በስፋት መቀጠል አለባቸው፡፡ የተደበቁ ጉዶች ይውጡና ዓለም ይወቀው፡፡ አንዲትም ጥይት ሳንተኩስ ወያኔን ማንበርከክ የምንችለው በዚህ አሣፋሪ ታሪኩ ጭምር ነው፡፡ ክፉዎችን የገዛ ኃጢኣታቸው ጭምር ስለሚያሳድዳቸው የጊዜ ጉዳይ ካልሆነ ወያኔ መቀመቅ የሚወርድበት ጊዜ ሩቅ አይደለም፡፡ እርግጥ ነው – ለጊዜው የሚያግደረድረው የማይናቅ የሰው ኃይልና ብዙ ገንዘብ እንዲሁም በደህናው ቀን ያሸሸው የጦር መሣሪያና ሎጂስቲክስ እንዳለው መገንዘብ አለብን፡፡ ሆኖም የመሣሪያና የወታደር ብዛት ጎዶሎ ቀንን እንደማያቃና መረዳትም ተገቢ ነው፡፡

ከአሁን በኋላ የለውጡ ኃይል የሚያደርገው ትግል ይበልጡን ከራሱ ጋርና ወያኔ ትቶብን ከሚያልፈው ዘርፈ ብዙ ችግር ጋር ነው፡፡ ይህም ትግል ቀላል አይደለም፡፡ ወያኔ ያሣረፈብን ጠባሳ ከወያኔ ጋር ከሚደረገው ትግል ባልተናነሰ እልህ አስጨራሽና አድካሚ ነው፤ ተስፋ መቁረጥ ግን አይኖርብንም፡፡ የመከነ አእምሮን፣ የጠፋ መልካም ስብዕናን፣ የወደመ ኢኮኖሚን፣ የተንሰራፋ ዘረኝነትን፣ የተበረዘና የተከለሰ እንዲሁም ይበልጡን አጋንንት በሚጨፍርባቸው አገልጋዮች የሚመራ ሃይማኖትን፣ አገርን እግር ከወርች ያሠረ ሙስናን፣ ሆድ አምላኪነትን፣ ኅሊናቢስነትን፣ ሀገርንና ወገንን ባወጣ መሸብቸብን የመሰለ ዕኩይ ባሕርይን፣ ጎጠኝነትን፣ ክፋትን፣ የሥልጣን ሱሰኝነትን፣ ራስ ወዳድነትን፣… ማስተካከልና ሚዛናዊ ስብዕናን የተላበሰ ዜጋን ወደ ቀድሞ ቦታው መመለስ እጅግ አስቸጋሪ ነው፡፡ ሆኖም ከፈጣሪ ጋር ይቻላል፡፡

 

LEAVE A REPLY

Please enter your comment!
Please enter your name here

This site uses Akismet to reduce spam. Learn how your comment data is processed.