ጥሩ የመንፈስ ፍላጎትን አድምጭነት – ልዩ መክሊት ነው – ለእኔ። (ሥርጉተ ሥላሴ)

ከሥርጉተ ሥላሴ 12.04.05 (ሲዊዘርላንድ ዙሪክ)

ዛሬ እንዲህ ወደ ሀገረ አሜሪካ ጉዞ አማረኝ። ስለምን? የንግግር ሥነ – ጥበብ ህግጋት መከበሩ መንፈሴን ስለገዛው።
ሥነ – ንግግር ጸጋ ነው። ሥነ – ንግግር ሙያም ነው፤ ሥነ – ንግግር ሁለት መንትያ ልጆች አሉት። እንደ ቤተሰብ የሚያቸውም የቅር ሥጋዎቹ አሉት። ሥጋዎቹን በቀጠሮ ልተውና የሥነ – ንግግር ባላና ወጋግራ የሆነው ጉልቻው ያፈራቸውን ልጆች እስኪ በጥቂቱ እንይ። የመጀመሪያ ልጁ „ተናጋሪ“ ይባላል። ሁለተኛ ልጁ ደግሞ „አድማጭ“ ይባላል። ሁለቱም እንደ ጸጋነታቸው በክህሎት ሊዳብሩ፤ በሥልጠና ክህሎታቸው ጥንግ ድርብ የሆነ ብቃትን ሊጎናጸፉ ይችላሉ። ሁለቱንም የተሰጣቸው ፍጡራን የታደሉ ናቸው። ወይንም አንዱን ብቻም የተሰጣቸው ግማሽ እድለኞችም ሊኖሩ ይችላሉ። በሌላ በኩል አንዱ ደመቅ ብሎ ዘለግ ሌላው ደግሞ ዝቅ ያለ ሁነትም ይገጥማል። ይህ በሂሳብ ስሌት ሩቦ የጎደለው ወይንም ሦስት አራተኛው የተሟላ እንደ ማለት፤ ወይንም ሶስቱ እጅ እንደማለት …..

 

የሥነ ንግግር ጥበብና ዕድገት ዝርዝር ሁነቶች፣ የአንድን ጥሩ ተናጋሪ መስፈርቶችን በሚመለከት 8ኛ መጸሐፌ ላይ ከተገናኘን መጠንኛ ግንዝቤ ለማስገንዘብ ትንሽ ነገር ብያለሁ። ስለዚህ ዘርዝር ያሉትን ነገሮች ገታ አድርጌ አሁን ወደ ተነሳሁበት መሰረተ ሃሳብ ስንሄድ፤ እንደ ህዝብ የኢትዮጵያ ህዝብ ጥሩ ተናጋሪም፤ ጥሩ አድማጭም መሆኑን  አሁን ለተነሳሁበት መሰረታዊ ጭብጥ ይመቸዋል። በነፍስ ወከፍ ስመጣ በሥነ ንግግር ህግጋት መስፈርቱን ያማሉ አብሶ አድማጭነት ቁሞ በእግሩ ሲሄድ ያዬሁት በጓድ ገ/መድህን በርጋ ነበር። ጓድ ገ/መድህን በርጋ የሀገር ውስጥ ንግድ ሚ/ር ቋሚ ተጠሪ፤ የጎንደር ክ/ሀገር ኢሠፓ ኮሜቴ የድርጅት ጉዳይ ኃላፊ፤ በኋላም የሚዛን ተፈሪ ክ/ ሀገር የኢሠፓ ኮሜቴ ተጠሪ የነበሩ ናቸው። የጓድ ገ/መድህን ጥሩ ተናጋሪነታቸው ንጥርነት የመነጨውም ቃላቶች ቢደረደሩ ሊገለጸው ከማይቸለው የምድመጥ ወደር የለሽ መክሊታቸው ነበር። የጓድ ገ/መድህንን የማድመጥ ሥነ ውበትን ለመተንተን ብዕሬ አቅም ፈጽሞ የላትም። የሥነ ንግግር ሙሉዑነት ብቃታቸው ፏፋቴ  ፍጽምና የተላበሰው ከማድመጥ መክሊታቸው ይቀዳ ነበር። አባይን ከምንጩ ከአናቱና ከሞገዳማ ፏፏቴው ጋር እሰቡት – እንደዛ ነው።

 

የጋዜጠኛ አበበ ገላው ፍላጎቱን የመደምጥ ብቃቱ የማዬው እኔ ከዚህ አንጻር ነው። በአፍሪካ ቆይታው የገጠመውን ዕድል ሳያሳልፍ ውስጡን በጥቂቱ ከፈት አድርጎ በጥንቃቄ ለሄሮድስ መለስ ዜናዊ የመጀመሪያ ቴስት የሰጠበት ነበር፤ በኋላም ሁኔታውና አጋጣሚሚውን ሳያሾልክ ወይንም ሳይዘል የመንፈሱን ፍላጎት ድምጸት አደባባይ አውሎ በድምጹ ብቻ ፈቃደ እግዚአብሄር የሰጠውን ታላቅ ኃላፊነት ታምርም ተወጣ። ያ የሬገን ህንፃ ሞገዳማ ድምጽ በጣም ብዙ ትርፍ አስገኝቷል። እርግጥ ውጤቱ የመንፈስ ስለሆነ በኪሎ ወይንም በጆንያ ወይንም በወራንታ መለካት አይቻልም።

 

እኔ እንዲህ እላላሁ፤ የሰው ልጅ መጀመሪያ የተሰጠውን ጸጋ ማወቅ አለበት። ሁለተኛው ደግሞ የተሰጠውን ጸጋ ለመፈጸም መፍቀድ አለበት። ሶስተኛው የተሰጠውን ጸጋ ለማድመጥ የተመቼ መሆን አለበት። አራተኛው የተሰጠውን ጸጋ ለመፈጸም የሚያስችሉ ሁኔታዎችን፣ ወቅቶችንና፣ አካባቢዊ አምክንዮችን ገምቶ መወሰን – መቆረጥና ከትክለኛው የፍላጎቱ ድምጽ ጋር መገናኘት ያስፈልገዋል። ሦስቱንም ጊዜም ጋዜጠኛ አበበ ገላው በተግባር አንቆጥቁጦታል። ጸጋው ይህ ነው፤ መክሊቱ ይህ ነው። ከሰማዬ ሰማዬት የተሸለመው የቤት ሥራውም ይህው ነው።

አቤዋ በእጁ በገባ ማናቸውም አጋጣሚ ሁሉ የፍላጎቱን እንብርት ለማሟላት አብዝቶ የሚባትል፤ ለትውልዱ የረቀቀ ሥጦታ ነው። አብሶ ወጣቶች አብነትነቱን ተከትለው መሰሉን ተግባር ለመከወን ከተጉ፤ ኢትዮጵያ ሀገራችን ፈተናዋም ሆነ የመፍትሄ መንገዶቿ ቀና ይሆናሉ። ለዚህም ነው በ2013 ዘሀበሻ አዘጋጅቶት በነበረው „አመታዊ የምርጥ ሰው“ የድምጽ አሰጣጥ ሥርዓት ላይ እኔ አንደኛ ጋዜጠኛ አበበ ገላውን፤ ሁለተኛ ጋዜጠኛ ተመስገን ደሳለኝን፤ ሥስተኛ አቶ ገ/መድህን አርያን አቅርቤ የነበረው። መጨረሻ ላይ „ማገዶው አቶ አንዶአለም አራጌ“ ማሸነፉም አስደስቶኛል።

 

አሁን ወደ ቀደመው። ቀደም ብዬ ያነሳሁትን ነጥብ መንገድ የተከተለው ጋዜጠኛና ገጣሚ ሳዲቅም በሀገረ አሜሪካ አቮይን ቀልባቸውን ገፎ ቁፍ ያላች ዶሮ አድርጓቸዋል። እነዚህ ወጣቶች ለእኛ ልዩ ምልክቶቻችን፤ የተግባር አርማዎቻችን፤ የድርጊት አዛውንቶቻች፤ የሥራም ልዩ እርስቶቻችን ናቸውና ከልብ ልናከብራቸው፤ ልናደንቃቸው ይገባል። የእውነት አሳራቶቻችንም ናቸው።

 

የማከብራችሁ ወገኖቼ የሰው ልጅ ለራሱ መኖር ከፈለገ ሁሉም ይሆናል። መንገዱም እጅግ ሰፊና በድሎት የሰገረ ነው። ይህን አሻም ላላ፤ የህዝብ ዕንባ ለሚጎረብጠው፤ እራሱን ፈቅዶ በመስጠት ኑሮውን የኮረኮንች – የዳገት – የፈተና ለማደረግ ፈቅዶ፤  ለምልዕትና ለሀገረ ኢትዮጵያ  ዕንባ ቅርብነቱን በድርጊት ለሚያቀልም ጀግና ውሎው አዳሩ በፈቀደው የዕንባ ዙሪያ ይሆናል። ይህ ደግሞ መታደል ነው። እኔ እንደማስበውም ምድራዊም ብቻ አይደለም። መዳህኒታዓለም አባታችን ፍቅሩን የገለጸበትን ሚስጥር በአምሳሉ በፈጠራቸው ፍጡራን ሲይ፤ እንዲህ መስዋዕትነቱ መክኖ አለመቅረቱን ሲመለከት በሰማይ ሳይቀር ታላቅ ደስታ ይሆናል። ሁልጊዜም ለተገፋ፤ ለተጨቆነ፤ ባሩድ በዬዕለቱ ለሚቀቅለው ወገን መጮኽ — መጮኽ  —- መጮህ —- መጮኽ ——- መጮኽ ———- ከዶሮ ጩኽት – እስከ ዶሮ ጩኽት ———ጩኽቱ እስኪሳማ ድረስ መጮኽ —- አሁንም መጮኽ —— ነገም መጮኽ —— ከነገ ወዲያም መጮኽ — የቅኑ አቤዋ መንገዱ ይህ ነው። የተፈቀደለትም ይኽው ነው። ወደ ፋመው ፈተና ፈጥኖ መገስገስ …. ስለሆነም ስለ ህዝብ ፍቅር አቤዋ መጻፍም መናገርም ይችላል። ሙሉዑ መብት አለውና! ሆኖታል – ተገኝቶበታል፤ ተስጥቶታልም።

 

አቤዋ አብዝቶ ቅን ነው። ሰውን በጣም ያምናል። ማንንም – በምንም ሁኔታ ይመጣል ብሎ አይጠረጥርም። ንጹህ ፍንትው ያለ ልብ አለው – ወገኖቹን በፍቅር የሚያቀርብበት፣ ፕሮቶኮል ሆነ ሲናርዮ ግጥሙ አይደለም። የወገኖቹ ጉዳይም ባለቤትነት አብዝቶ ይሰማዋል። የፈለገ ከመጠን ያለፈ ቢሆን ድካም ዝር አይልበትም – በተለይ ለችግር ቅርብ ነው። ክብርና ኩራትም አይሻም። ጥሩ አድማጭ ነው። ከግለሰብ ጀምሮ የአካሉን ችግርን ለመጋራት የወደደ ነው። ወገኖቹ ስለሚያደርጉት መልካም ነገር አንደበቱን ከፍቶ ያደንቃል – ያበረታታል – ተስፋ ይሆናል – ስለነገ ብሩህ ቀን ዘለግ አድርጎ በጎ ያስባል – አውንታዊ ነው። እንደ ታናሽነቱም ቀልጣፋ ታዛዥም ነው። ድፍረቱ ያጠግባል፤  የማይመቸውን ነገር ፊት ለፊት ወጥቶ ይናገራል – ስለሆነም የግንባር ሥጋ ነው። በጋዜጠኝነት ሙያ ላይ ለተሰማሩት ወገኖቹ ለሚታሰሩት –  ለሚሰደዱት – ለሚገፉት – ለሚገለሉት ደግሞ ማገራቸውና ልዩ ድምጻቸው ነው። የሙያ ቤተሰቦቹን እንደ እራሱ የአብራክ ልጆቹ ነው የሚያያቸው የትም ይኑሩ የትም። ጠበቃቸው – ዋቤያቸውም ነው። እውነትን አቤ ይወዳል። አቤ የኢጎ በሸተኛ አይደለም። ያልተገባ ክብር ፈጽሞ አይሻም – አይቀበልምም። አሁን እኔ „ጋዜጠኛ“ ከሚለው ቃል በተጨማሪ አንዲት ቃል ባክል አይፈልግም – አይወደውም።

 

እጅግ የማከብራችሁ የሀገሬ ልጆች  እግዚአብሄር አምላክ የሰውን ልጅ ሲፈጥር እንድናመሰግነው ብቻ እንጂ እሱ ምን ጎድሎበት? ከእኛስ ምን የሚፈልገው ነገር ኖሮ? ጋዜጠኛ አበበ ገላው  እንደ አናንያ፣ እንደ አዛርያ፣ እንደ ሚሳኤል ገብቶ ከጋመው እሳት የተማገደው፤ ኑሮው የተበተነው፤ ከቦታ ቦታ የተንካራተተው እለበቃ ብሎ እንሆ ዛሬም የአለሙን መሪ ፕ/ ባራክ ኦባንም መድረክ ላይ መጎተ። ህሊናቸውን ፈተነ። መንፈሳቸው ላይ በትልቁ ጥያቄ ምልክት በቃለ አጋኖ አስቀመጠ። ተባረክልኝ ወንድምአለም – የእኔ ብርቅ ታንሽዬ።

 

የእኔ ክብረቶች ወገኖቼ —  ዕንባ እንዲህ – ይደመጣል። ዕንባ እንዲህ  ይተረጎማል – በትውልዱ። የዛሬ ጹሑፌ መሰረታዊ አላማ አቤዋን እግዚአብሄር ይስጥልን እናትዬ፤ ኑርልን የኔ አባት፤ ድንግልዬ ጥላ ከለላ ትሁንልህ፤ አንተ ኩራት ነህ ለማለት ነው። አቤዋ „ጠንቃቃነት ያተርፋል እንጂ አያከስርምና፤ ከሰማይ በታች ባለ ነገር ሁሉ አደራ ጠንቃቃ ሁን!“ ጦርነቱ የእርስ በእርስ ነው። በዚህ ውስጥ የማይታዩ ዲቃላ ፍላጎቶች፤ የከሱ የሚመስሉ አንገታቸውን ደፍተው የታቆሩ ጥቁር ስሜቶች፤ ኮሳሳ መስለው ቀን የሚጠብቁ ሴራዎችም ሊኖሩ እንደሚችሉ ምንጊዜም ማሰብና ስንዱ መሆን ይሻል። ቅንነትን ማስንበት የሚችለው መኖር ሲቻል ብቻ ነው። ለመኖር ደግሞ በተጓዳኝ ያሉ ነገሮችን ሁሉ በማስተዋል ጥንቃቄን ገበራቸው ማድረግ መሰረታዊ ነው። ከዚህ የበለጡ ህዝበ ጠቀም ተግባራትን ሆነ ገድላትን መፈጸም የሚቻለው በህይወት መኖር ሲቻል ብቻ ነው። እርግጥ አንድዬ አለ። ፈጣሪ አምላክ የሰጠውን ለማቆዬት ጥበቃው ይኖራል። ነገር ግን ሰውም የተገባውን ያህል ለራሱ ጥንቃቄ ማደረግ አለበት። ጥንቃቄ በራሱ ነገን ይወልዳልና።

መከወኛ። አቤዋ! ሁልጊዜም አንተ እሳት ውስጥ ገብተህ መርመጥምጥ የተፈጠርክበት፤ እግዚአብሄር አምላክ መርቆና ቀብቶ የሰጠህ ብቸኛው መንገድህ፤ ቀበቶህም ነውና መልካምና ቀጣይ የመስዋዕትነት ጊዜ – ከድል ጋር እህትህ -አድናቂህና አክባሪህ ተመኘሁልህ። ቤተሰብህን እግዚአብሄር አምላክ ጥበቃ ያድርግ። አሜን።

 

የኔዎቹ በ8.04.2014 በነበረኝ የራዲዮ ፕሮግራምም ስለ አቤዋ በተደጋጋሚ ያልኩት ነገር ነበረኝ። ወፊቱ ሹክ ብላኝ ይሆን? አላውቅም። ብቻ ግን ማድመጥ ትፈልጋላችሁ? መልሱ „ተገኝቶ ነው“ አላችሁ አይደል። የቀረ የለም ዝልዝሉ ጥበሱ ድውለቱ ሽሮም ጨጨብሳውም ያቺ ልስልስ እጅ ቁርጥም የምታደርገው ቡላዬም አለች  www.tsegaye.ethio.info Aktuell Radio Lora www.lora.ch.tsegaye ጎራ በሉና ዘንጣፌ ጤፍ እንጀራ ጋር ታደሙ። ግን ትእዛዝ አይደለም ማስታወስ …. መንፈስን በስንቅ ለሚያኖሩት የመስዋዕትንት ውዶቻችን እንዲሁም እናንተስ ልምን ይቅርባችሁ፤ ናፍቆት የሆናችሁትን አድማጮቼን ጨምሮ አባታችን ይጠብቅልኝ። አሜን! ጨረስኩ – ለዛሬ።

 

ኢትዮጵያዊነት ፈተናን አሸንፎ የተፈጠረ ሚስጥር!

 

እግዚአብሄር ይስጥልኝ።

 

 

LEAVE A REPLY

Please enter your comment!
Please enter your name here

This site uses Akismet to reduce spam. Learn how your comment data is processed.