የመከላከያ መማክርት በጠቅላይ ሚኒስትር ጽ/ቤት ውይይት አደረገ

የመከላከያ መማክርት (ካውንስል) ዛሬ በጠቅላይ ሚኒስትር ጽ/ቤት ውይይት አድርጓል፡፡

የአገር መከላከያ ሰራዊት በሕጋዊ መዕቀፎች፣ በአደረጃጀት፣ በመፈጸም ብቃትና በትጥቅ ከፍተኛ የለውጥ ጎደና ላይ እንደሚገኝ የተገለጸ ሲሆን፣ ይህንን ለውጥ በሁሉም ደረጃ ተፈጻሚ ከማድረግና ወደታች ከማውረድ አንፃር የተገኙ ተጨባጭ ውጤቶች፣ የታዩ ክፍተቶችና ቀጣይ አቅጣጫዎች ላይ ውይይት ተደርጓል፡፡

ውይይቱን የመሩት የጦር ኃይሎች ጠቅላይ አዛዥ ጠቅላይ ሚኒስትር ዶ/ር ዐቢይ አህመድ ሲሆኑ፣ መከላከያ እስከሁን ያደረጋቸው የተቋማዊ ሪፎርም ስራዎች ምን ያህል ርቀት እንደተጓዙ በመገምገም ቀጣይ አቅጣጫዎችን አስቀምጠዋል፡፡

መከላከያ የአገሪቱ አቅም በፈቀደ መጠን ቴክኖሎጂን የሚታጠቅ፣ በራሱ አቅም መጠገን፣ ማሳደግ ብሎም መፍጠር የሚችል እንዲሆን በርካታ የአቅም ግንባታ ስራዎች እየተሰሩ መሆናቸው በውይይቱ ላይ ተገልጿል፡፡

መከላከያ ከቴክኖሎጂ ጋር ጥብቅ ቁርኝት ያለውና እንደ ሌሎች አገራት ከራሱም አልፎ ለሌሎች የቴክኖሎጂ ዘርፎች ምንጭ መሆን የሚችል እንዲሆን ለማድረግ እየተሰሩ ያሉ ስራዎችም ተገምግመዋል፡፡

መከላከያው በሁሉም ደረጃዎች የሁሉም ብሔር ብሔረሰቦች ተዋጽኦ የጠበቀ ለማድረግ እየተከናወኑ ያሉ ተግባራትም ተገምግመዋል፡፡

የአገሪቱን ውስጣዊና ካባቢያዊ ሁኔታን ታሳቢ ያደረገ የሰራዊት አሰፋፈር እንዲኖር የተጀመረው እንቅስቃሴ ላይ ሰፊ ውይይት የተደረገ ሲሆን፣ በዚህም የመከላከያ ሰራዊት አሰፋፈር ወቅታዊ፣ ተጨባጭና ታሳቢ ስጋትን መሰረት ባደረገ መልኩ የሚወናወን በመሆኑ ሕብረተሰቡም በዚህ መልኩ እንዲረዳው ማድረግ አስፈላጊ መሆኑም በውይይቱ ላይ ተነስቷል፡፡

ምንጭ:- የጠቅላይ ሚኒስትር ጽ/ቤት

LEAVE A REPLY

Please enter your comment!
Please enter your name here

This site uses Akismet to reduce spam. Learn how your comment data is processed.