ኢትዮጵያ ሆይ ጩሂ! – ሠዓሊ አምሳሉ ገ/ኪዳን አርጋው

ሀገራችን የት ነው ፤ አዶናይ ፈጣሪ?

እዚህ ከቀያችን ፤ ሰርክ ተባራሪ

ባዕድ ተገፍታሪ ፤ ተሳዳጅ ደንባሪ

የትም የሚደፋ ፤ ወኅኒ  ተወርዋሪ

መፈናፈን ባንችል ፤ በግፍ ብንቀጣ

ሠርተን መብላት ባንችል ፤ አማራጭ ብናጣ

መኖር ብንነፈግ ፤ ለመኖር ብንወጣ

በሞት ላይ አፍጥጠን ፤ ተመምን በፍርጠጣ

እግር ወደ መራን ፤ ወደ ሆነን ዕጣ፡፡

በስደቱም ምድር ፤ ከሰሜን ደቡቡ

በአራቱም አቅጣጫ ፤ በምሥራቅ ምዕራቡ

ግማሹ ተበልቶ ፤ በበረሀው አውሬ

በባሕሩ ዓሣ ፤ ሐዘኑ መረሬ

በሞት ጥላ አልፎ ፤ በገባበት ሀገር

ሌላ ዙር መከራ ፤ ደሞ ሌላ አሳር

ከፎቅ ተወርዋሪ ፤ መንገድ ተጣይ ደሀ

ተቀቃይ ተጠባሽ ፤ በእሳት በፍል ውኃ

ሠርተህ በላህ ተብሎ ፤ ለቁራሽ እንጀራ

እንደ ቅርጫ ሥጋ ፤ ቅመስ በገጀራ

በቤንዚን ተቃጣይ ፤ ላይገኝ እሬሳ

በውለታ ቢስ ትውልድ ፤ በሚያንስ ከእንስሳ

ይሄ አነሰንና ፤ አሁን በመጨረሻ

ክርስቲያን ስለሆን ፤ የክርስቶስ ድርሻ

ለዘለዓለም ሕይዎት ፤ ለአሳር መካሻ

በአረመኔ አራዊት ፤ በውለታ ቢስ ውሻ

የሰው ሥጋ ለብሰው ፤ በመጡ ሰይጣናት

በቡኤልዜቡል ልጆች ፤ በውሉደ አጋንንት

የሰው ልጅ ደም ብቻ ፤ በሆነ ጥማቸው

በገሀነም ልጆች ፤ በእርኩሰት ክብራቸው

እንደ መሥዋዕት በግ ፤ ታራጅ በጅሐድ ካራ

በአረር ተደብዳቢ ፤ ለማተቡ አደራ

መንግሥት አልባ ወገን ፤ ሀገር አልባ ዜጋ

ከቶ ወዴት እንሸሽ ፤ ወዴት እንጠጋ

የሚያሳደንን ሞት ፤ እንግልት መከራ

የት ሔደን እናምልጥ ፤ ማንን እንጣራ

ካንተ በላይ አምላክ ፤ ካንተ ሌላ ጌታ

ከቶ ማን አለና ፤ አዳኝ መከታ

የት ነው ሀገራችን ፤ በሰላም ማደሪያ

በእፎይታ መኖሪያ ፤ በክብር መቀበሪያ

ቢኖረንማ ሀገር ፤ ማደሪያ መኖሪያ

እያልን የምንጠራት ፤ ውድ እናት ኢትዮጵያ

ባለቤቷ ሆነን ፤ የምንደክምላት

አይሆንም ሳንባል ፤ የምንገነባት

ምን ታዲያ አሰደደን ፤ ከቶ ምን አስወጣን?

በአራቱም አቅጣጫ ፤ በሞት ላይ አፍጥጠን?

ወገን ተሰደንም ፤ ከሆነ የማንተርፍ

እንዲህ ያለ ዋጋ ፤ በከንቱ ከምንረግፍ

የሀገርን ጠላት ፤ ያሰደደንን ጠንቅ

ጉሮሮውን አንቀን ፤ ይዘነው በመውደቅ

ትርፍ እናትርፍባት ፤ ዋጋ ይኑራት ነፍስ

ሀገር ነጻ ትውጣ ፤ ስማችን ይሁን ቅርስ

ሞት በኛ እንዲበቃ ፤ አሰቃቂው ስደት

ትውልድ ተጻ እንዲሆን ፤ እንዲኖር ደኅንነት፡፡

ኢትዮጵያ ሆይ ጩሂ ፤ እሪ በይ እማማ

መጽናናት አትመኝ ፤ ልበሽ የሐዘን ሸማ

ከልዑል ማደሪያ ፤ ከሰማየ ራማ

እንደ ራሔል እንባ ፤ ለቅሶሽ እንኪሰማ

እንባሽ እስኪታበስ ፤ እስክትወጪ ከአድማ

ልጆቸን አስበሉ ፤ ታረዱ እንደ ኮርማ

አለቁብኝ በይው ፤ ቶሎ ፍረድ ፌማ፡፡

ሠዓሊ አምሳሉ ገ/ኪዳን አርጋው

ሚያዝያ 12 2007ዓ.ም.

LEAVE A REPLY

Please enter your comment!
Please enter your name here

This site uses Akismet to reduce spam. Learn how your comment data is processed.