ባለቤቴ የራሱን ሕይወት ያጠፋል ለማለት እቸገራለሁ” የኢንጂነር ስመኘው በቀለ ባለቤት ወ/ሮ እሙን እሙን ጌቴሁን ማዘንጊያ

ይድረስ ለኢትዮጵያ ሕዝብ
“ባለቤቴ የራሱን ሕይወት ያጠፋል ለማለት እቸገራለሁ”
የኢንጂነር ስመኘው በቀለ ባለቤት ወ/ሮ እሙን እሙን ጌቴሁን ማዘንጊያ ከካናዳ ቶሮንቶ

የተከበራችሁ ኢትዮጵያዊያን ወገኖቼ፤
ወ/ሮ እሙን ማዘንጊያ እባላለሁ፡፡
የአቶ ስመኘው በቀለ ባለቤትና የልጆቹ፤ የበእምነት ስመኝው፤ አሜን ስመኘውና ጽናት ስመኝው እናት ነኝ፡፡ በአሁኑ ወቅት ነዋሪነቴ፤ በቶሮንቶ ካናዳ ነው፡፡

ዛሬ ከፊታችሁ ተገኝቼ ይህንን መግለጫ የምሰጥበት ምክንያት ከሁላችሁም የተሰወረ አይደለም፡፡ የባለቤቴን፤ የአቶ ስመኘው በቀለን ድንገተኛ ምስጢራዊ ሞት ይመለከታል፡፡

ሀሙስ፤ ሀምሌ 19 ቀን፤ 2010 ዓ.ም. ለኔና ለቤተሰቦቼ፤ እንዲሁም ለኢትዮጵያ ህዝብ አሳዛኝ ቀን ነበር፡፡ በመገናኛ ብዙሀን የተለቀቀው፤ ባለቤቴ፤ ስመኝው በቀለ፤ ጠዋት በመስቅል አደባባይ፤ ሞቶ ተገኘ፤ የሚለው ዜና፤ ቅስም ሰባሪና አስደንጋጭ ነበር፡፡

ባለቤቴን እስከማውቀው ድረስ፤ ፈሪሀ እግዚአብሄር ያለው፤ ታታሪ፤ አገሩንና ቤተሰቡን የሚወድ፤ በምንም አይነት መልኩ ልጆቹን፤ አገሩንና ቤተሰቡን ጥሎ፤ የራሱን ሕይወት ያጠፋል ብዬ የማላስበው ሰው ነው፡፡ ስለዚህ ባለቤቴ ራሱን አጠፋ ለማለት እቸገራለሁ፡፡

በዚህ በስደት በምኖርበት ካናዳ፤ የባለቤቴን ድንገተኛ ሞት በሰማሁ ግዜ፤ ሀዘኔ መሪር ሆኗል፡፡ የስደትን አስከፊ ገጽታ የተረዳሁበት ክስተትና ዜና ነው፡፡

ስለዚህም ላለፉት 4 ሳምንታት በአደባባይ ወጥቼ፤ ሀዘኔን መግለጽ፤ የኢትዮጵያን ህዝብ ማመስገን አልቻልኩም፡፡

በባለቤቴ ሞት መሪርና የማይቆርጥ ሀዘን ቢሰማኛም፤ የባለቤቴን ሞት ተከትሎ የኢትዮጵያ ህዝብ ያሳየው ፍቅር፤ ድጋፍና፤ የሀዘን መግለጫ፤ መጽናኛ ሆኖኛል፡፡

ባለቤት ለሀገሩ ካለው ጽኑእ ፍቅር የተነሳ፤ የራሱንና የልጆቹን ህይወት በድሎ ለህዳሴው ግድብ ግንባታም ይሁን ለሌሎች ታላላቅ ግድቦች ግንባታ መስዋእትነት ከፍሏል፡፡ ሞቱን ተከትሎም፤ የኢትዮጵያ ህዝብ ያሳየው ፍቅር፤ ባለቤቴ እንዳልሞተና፤ በስራው ሕያው ሆኖ እንደሚኖር አሳይቶኛል፡፡

በዚህ አሳዛኝና አስቸጋሪ ወቅት፤ ከጎኔ በመሆን ላጽናናችሁኝ፤ የቶሮንቶና አካባቢው ኢትዮጵያውያንና ኤርትራዊያን፤ እንዲሁም በአገርቤት ልጆቼን የተንከባከባችሁልኝ ወገኖቼ፤ ፈጣሪ ብረድራችሁን ይክፈል፡፡

የኢትዮጵያ መንግስት፤ የባለቤቴን አሟሟት አጣርቶ፤ እውነታውን ለኢትዮጵያ ህዝብ ይፋ እንደሚያደርግ ተስፋ አደርጋለሁ፡፡
ወደፊት፤ ጊዜና ሁኔታዎች ሲፈቅዱ፤ የማውቀውንና የሚሰማኝን በሰፊው እስገልጽ ድረስ፤ ልክ እንደእስካሁኑ ሁሉ; በአርምሞና በጸሎት; ግዜዬን እንዳሳልፍ እንደምትፈቅዱልኝ አምናለሁ፡፡ አመሰግናለሁ፡፡

ወ/ሮ እሙን እሙን ጌቴሁን ማዘንጊያ ከካናዳ ቶሮንቶ

2 COMMENTS

  1. ወ/ሮ እሙን ሐዘንዎ ሐዘናችን ነው።እግዚሐብሔር ያጥናዎት።ዝምታዎን ሰብረው ስለባለቤትዎ ሐሳቦን መሰንዘርዎ የሚደነቅ ነው። በዚህ አጋጣሚ የሚያውቁትን ወደፊት ከሚገልጹ እውነት ተድበስብሶ ሳይረሳ መግለጽ ያለበት ወቅቱ አሁን ነው።ፈጣሪ ብርታቱን ይስጥዎ።

  2. ወ/ሮ እሙን እግዚአብሄር አምላክ የባለቤትዎን ነፍስ በአብርህም እና ይስሀቅ ጎን እንዲያኖረው የሁልጊዜም ፀሎታችን ነው፡፡
    ከላይ የተፃፈው መልዕክት እውን የርሶ ከሆነ በዚህ አጋጣሚ ለአብዛኛው ህዝብ ጥያቄ የሆነውን የእርስዎ በባለቤትው የቀብር ሰነስርዓት አለመገኘት ብቻ ሳይሆን እስከዛሬ ልጆችዎትን ብቻቸውን መሆናቸው እየታወቀ ወደሀገር ያልመጡበት ምክንያት ግራ የሚያጋባ ስለሆነ ለዚህም ምላሽ የሚሆን ነገር ቢያካፍሉን ? ከተቻለ በድምፅ የተደገፍ ቢሆን ጥሩ ይሆናል፡፡ከዚህ በፊት ትክክል ይሁን አይሁን ባይታወቅም አንድ የሆነ ሰው ከካናዳ የድምፅ መልዕክት አስተላለፏል ፡፡ እኔ በበኩሌ ግን ያንን ከሰማሁ በኋላ ብዙ ጥያቄዎች በአዕምሮዬ እየተመላለሱ ነው፡፡ ጥያቄዎቸን አሁን መናገር ላያስፈልግ ይችላል ፡፡ ምክንያቱም እርስዎ ያለውን ሁኔታ ግልፅ ካደረጉት ምላሹን ማግኝት ስለሚቻል፡፡
    እግዚአብሄር ያፅናዎት!!!
    በድሉ

LEAVE A REPLY

Please enter your comment!
Please enter your name here

This site uses Akismet to reduce spam. Learn how your comment data is processed.