ያኔ ነው መተንፈስ / ግርማ ቢረጋ /

ከላይ የሰቀልከው ብታገኘው ወርዶ
ጠንቀቅ በል ወገኔ አታድረገው መርዶ ።
ሃያ ሰባት ዓመት ሲሸረብ የኖረ
በዚህ በአጭር ግዜ ገሎ ለቀበረ ።

ብቻ በል ተቀበል ሲሉህ እንዳትሰማ
ቢኖር አይግረምህ አይምሮው ጠማማ ።

ደሞ በዚህ ሰዓት ብታገኘው ወርዶ
በዘር ተሸብሽቦ እራሱን አዋርዶ።

አትደንግጥ ብታየው ጭራውን ሲቆላ
ለንዋይ የሸጠ እራሱን የበላ።

ሞልቷል በየ ደጁ ለከርሱ የሚሞት
ገና ሳይናገር ሃሳቡ የሚሸት ።

ሽቅብ የሚገፋው ላንቃው የቀረና
ቅርሻት የበዛበት ገና ብዙ አለና ።

ድንገት ብታገኘው ቢያሰማህ እሮሮ
ኖሮ የሚመስለው ስንት አለ ቆርቆሮ ።

አጥንት የሚቆጥር ወገኑን የበላ
ለስጋው ያደረ ህሊናው የተላ ።

አጥንቱን የሚያሸት ትልቅ ነገር ትቶ
ስንት አለ መሰለህ ሕሊናው ቡትቶ
እንቅፋት የሚሆን እሱ እራሱ ሞቶ ።

ጭልጥ ያልክ ደንቆሮ ማሰብ የተሳነህ
ካልሆንክብኝ በቀር ምነው ታሽካካለህ።

ማሰብ ማገናዘብ ካልመጣልህ ጭራሽ
ሆነህ ከምትቀር የእናትክን ጡት ነካሽ።

ግራ ቀኝህን ተመልከት የሚሉትን ስማ
ሁሉም ተጠራርተው ይሉሃል አሳማ ።

ያደረገህ እሱ ሃገር ሻጭ ነው ባንዳ
ማስተዋልም ጀምር እራስክንም አፅዳ ።

ጭራሽ እንዳትጠፋ ሆነህ ስብርባሪ
ግዜው ይሄኔ ነው ከሌለህ መካሪ ።

ከፊትህ የሚታይ ስንት ያለበት ተስፋ
በኔ በአንተ ግጭት አንገቱን ሲደፋ ።

ምን ይሆን መልሳችን ምንስ ልናወራ
በኔ በአንተ ግዜ ፍቅር ተሰባብራ ።

ሲታወክ ጤናቸው ሲደማ አካላቸው
ህፃናቱ ወድቀው ማልቀስ ሲሳናቸው ።

እስኪ ትንሽ ስማ እነማን ምን አሉ
ሰበኩ ወይ ህብረት ባንድነትስ በሉ ።

ምነው መደናበር ማላገጡን ብትተው
ለአንተም ለወገንህ የሚጠቅም እሱ ነው።

አስተውል ተመልከት ዙሪያ ገባውን
ጠግበው ሲተፉብህ ግማት ቅርሻቸውን ።

ረሃብ ተሸክሞ  መቼም ጥጋብ የለ
እነሱ ለበሉት አግሳ የሚልህ የለ ።

ከስርቻ ወጥተን በአደባባይ ሞቀን
ለዜግነት ክብር ሞኝ መስለን ታይተን
ማሰብ ስንጀምር ከቀረጢት ወጥተን
የዜግነት ትግል መንፈሱ ሲገባን
መባነን ስንጀምር መኝታው ሲበቃን።

ህልማችን እውን ሆኖ መተባበር ሲኖር
ያሰብነው ሲሳካ ጨለማው ሲሰበር ።

ያኔ ነው መተንፈስ መረጋጋት ኖሮ
የለውጡን እንቅፋት ጠራርጎ አባሮ ።

ፌብሩዋሪ 2019
ስቶክሆልም

ዝም በል ይሉኛል / ግርማ ቢረጋ /

ፈራ ወይ ገሞራው ወዴት ተሸሸገ
ጥበብን በብዕር ወልዶ ያሳደገ ።
ምነው የትስ ገባ ,,, ሸሸ ወይ ገሞራው
ለሃገሩ ክብር ሞትን የማይፈራው ።
ብዬ በተናገርኩ ዝም በል ይሉኛል
እኮ እንዴት ዝም ልበል
ያጣሁት ታሪኬ ህይወቴ ነው ሀይሉ
እኮ እንዴት ዝም ልበል ?
የታሪኬ መግቢያ መዝጊያውም እሱ ነው
የፈጠረው አምላክ ነብሱን ብቻ ይማረው ።
/ ስቶክሆልም /
ኖቬምበር 2018

LEAVE A REPLY

Please enter your comment!
Please enter your name here

This site uses Akismet to reduce spam. Learn how your comment data is processed.