ኃይሌ ጋርመንት ፊት ለፊት ያለው መንደር “ከሰባት ወራት በፊት መብራት አያገኝም” መባሉ ነዋሪዎችን ለጭንቀት ዳርጓቸዋል!

አዲስ አበባ ውስጥ በተለምዶ “ኃይሌ ጋርመንት” እየተባለ በሚጠራው “ፔፕሲ መንደር” አካባቢ የሚገኙ በግምት 300 ከሚሆኑ ቤቶች መካከል የተወሰኑት መብራት ከተቋረጠባቸው አራት ቀናት እንዳለፋቸው ከአካባቢው ነዋሪዎች መረዳት ተችሏል፡፡ ስማቸው እንዲጠቀስ ያልፈለጉ አንድ አባወራ ለዚህ ዜና አቅራቢ ጉዳዩን እንደሚከተለው አስረድተዋል፡፡

ከ15 ዓመታት ወዲህ በተለይ በበዓላት ቀናት መብራት ከምናገኝበት የማናገኝበት ቀን ይበዛል፡፡ ከቅርብ ጊዜ ወዲህ ግን ለይቶልን ኑሯችን ዳፍንት ወርሶታል፡፡ ለሻማና ለጋዝ ጭስ ተዳርገን ፍዳችንን እያየን ነው፡፡ አንዳንዴ በተከታታይ ከሣምንትና ከ15 ቀናት በላይ ያጠፉብንና ለተወሰነ ጊዜ ብልጭ አድርገው እንደገና ያጠፉታል፡፡ ሄደን ስንጠይቅ “ይመጣላችኋል፤ እዛው ጠብቁ” ይሉናል፡፡ የምናደርገው ነገር ጨንቆናል፡፡

ችግሩ ሲባዛብን ሰሞኑን ተሰባስበን ወደ ቢሯቸው ሄድን፡፡ ስንሄድ “ቢሮው ወደ ለቡ ተዛውሯል” ተባልን፡፡ እዚያም ሄደን ኃላፊውን ስንጠየቅ “ችግሩ ፊውዝ ነው” አለን፡፡ “ታዲያ ምን ተሻለን?” ብለን ስንጠይቀው “በውጭ ምንዛሬ ዕጦት ምክንያት ለጊዜው ፊውዝ የለም፤ ገንዘብ እንደተገኘ ይገዛል፡፡ እስከዚያው ተመዝገቡና ተራችሁን ጠብቁ፡፡ ከሰባት እስከ ስምንት ወር ሊፈጅ ይችላል፡፡ ለማንኛውም በትግስት ጠብቁ ወይም እናንተ ራሳችሁ ግዙና እንግጠምላችሁ” አለን፡፡ “ለስምንት ወር ካለመብራት ልንቆይ?” ብለን ስንጠይቀው ኃላፊው ምንም ሳይመስለው በማሾፍ መልክ “ሌላ ምን ምርጫ አላችሁ?” ብሎ ቀለደብን፡፡ ከፊቱ የሚነበበው “ገንዘብ አምጡና አሁኑኑ እንግጠምንላችሁ” የሚል ይመስላል፡፡ ምክንያቱም ያንዱን ለመጠገን ሲሄዱ የሌላውን ሆን ብለው በማበላሸት በሙስና የተጨመላለቀ አሠራር ውስጥ እንደተዘፈቁ በስፋት ይታወቃል፡፡ እንዲያውም አንዱ የመብራት ኃይል ሠራተኛ አንድ ጊዜ የተበላሸ መብራት ጠግኖ ሊመለስ ሲል ሌላውን አበላሽቶ ከምሠሶው ሲወርድ ወጣቶች ደርሰው ሊደበድቡት ሲሉ “እባካችሁ አትንኩኝ፤ አሁኑኑ አስተካክዬ እወርዳለሁ” በማለቱ ምረውታል፡፡

በሌላ በኩል ግን የኛ ጎረቤት የሆኑ 200 የማይሞሉ ነዋሪዎችን የሚያገለግሉ 8 ወፍጮ ቤቶች መብራት መቼም ቢሆን አይቋረጥባቸውም፡፡ እነዚህ ወፍጮ ቤቶች ወፍጮውን ሲተክሉ ጀምሮ ብዙ ገንዘብ በጉቦ መልክ ለመብራት ኃይል የሥራ ኃላፊዎች እንደሚሰጡ እንሰማለን፡፡ የኛን የሚያጠፉትም ለነሱ ኃይል ለማብዛት እንደሆነ ይነገራል፡፡

ከነዋሪዎቹ መረዳት እንደተቻለው የአካባቢው ወጣቶች በነዚህ የመብራት ኃይል የሥራ ኃላፊዎች በሙስና የተጨመላለቀ ብልሹ አሠራር በመበሳጨት በሰዎቹ ላይ ጉዳት ሊያደርሱባቸው እየዛቱ መሆኑንና የአካባቢው ወላጆች ግን ችግሩን ለመቅረፍ በህግና በህግ ብቻ ለመፍታት እንደሚንቀሳቀሱ ለወጣቶቹ በማስረዳት እንዲታገሱ በመምከር ላይ መሆናቸውን የመረጃ ምንጫችን ገልጸዋል፡፡ ሆኖም ችግሩ ሳይቀረፍ ቀርቶ ወጣቶቹም ሆኑ ማንም ተበደልኩ የሚል አካል በነዚህ ተለይተው በሚታወቁ በሙስና የሚታሙ የሥራ ክፍሉ ኃላፊና ምድብ ሠራተኞች ላይ አንዳች ነገር ቢደርስ ተጠያቂዎቹ ራሳቸው መሆናቸውን ሊያውቁ እንደሚገባ ተጠቁሟል፡፡ ይህን ማለት ያስቻለን ችግር ፈጣሪዎቹ ሠራተኞች በሕዝብ ይታወቁ ዘንድ ፎቶግራፋቸው ተባዝቶ በመንደሩ ውስጥ እየተበተነ ስለሚገኝ የዚህ ነገር መቋጫ ደግሞ ከግምት ባለፈ ምን ሊሆን እንሚችል በግልጽ መረዳት ስለማይቻል ነው፡፡ ከዚህ አንጻር መናገር የሚቻለው ሌላው ማሰረጃ ወጣቶቹ ምን ማድረግ እንዳለባቸው እየተመካከሩ በነበረበት ወቅት ጉዳዩን በቅርብ የተከታተሉ እናቶች “ልጆቻችን ችግር ከሚያስከትሉና ከሚያስወቅሱን፣ እነሱም ወንጀል ውስጥ ከሚገቡብን እኛው ሄደን የመብራት ኃይል ሠራተኞችን ብንለምናቸው መፍትሔ ይገኝ ይሆናል” ከሚል ተስፋ  ሄደው መማጸናቸውና ልፋትና ድካማቸው ዋጋ አጥቶ መቅረቱ ነው፡፡ ስለዚህ ችግሩ ከባድ መሆኑ ሊታወቅ ይገባል፡፡

ጉዳዩ የሚመለከተው የመብራት ኃይል የበላይ አካል ይህን በዜጎች ላይ የሚፈጸም ደባና ተንኮል ተከታትሎ ለችግሩ አወንታዊ መፍትሔ እንዲሰጥ የዚህ መረጃ አጠናቃሪ ማሳሰብ ይፈልጋል፡፡ ብሶት ሲጠራቀም የሚፈጠረው ነገር ከግምት በላይ በመሆኑ የሥልጣኔ ማዕከል በሆነች የሀገር ዋና ከተማ ውስጥ ያለ መብራት መኖር የሚታሰብ አይደለምና ችግሩ ለነገ የሚተው አለመሆኑን ሁሉም ወገን ተገንዝቦ ለተፈጠረው ሰው ሰራሽ ችግር ዕልባት ለማግኘት መረባረብ ይገባዋል፡፡

ለመረጃ ጥንቅሩ ምሕረት ዘገዬ ከአዲስ አበባ (mz23602@gmail.com)

 

 

 

LEAVE A REPLY

Please enter your comment!
Please enter your name here

This site uses Akismet to reduce spam. Learn how your comment data is processed.