በብሔራዊ ምርጫ ቦርድና በጠቅላይ ሚኒስትር አብይ አስተዳደር መካከል ውዝግብ ተፈጠረ።– ታማኝ ምንጮች

(ኢትዮ 360 — ነሐሴ 3/2011) በኢትዮጵያ በቀጣዩ አመት የሚካሄደው ምርጫ በምርጫ ቦርድና በጠቅላይ ሚኒስትር አብይ አስተዳደር መካከል ውዝግብ ማስነሳቱ ተሰማ።

የኢትዮ 360 ታማኝ ምንጮች እንደገለጹት ውዝግቡ የተነሳው የጠቅላይ ሚኒስትር ዶክተር አብይ አስተዳደር ምርጫው ለሁለት አመት ይራዘም በሚል ያቀረበው ሃሳብ በምርጫ ቦርድ በኩል እንዲነገርልት በመፈለጉ ነው።

ምርጫ ቦርድ በኔ በኩል በቀረኝ ጊዜ ዝግጅቴን አጠናቅቄ ምርጫውን ማካሄድ እችላለሁ፤ ምርጫ ለማካሄድ አልችልም ያለው መንግስት ስለሆነ መንግስት እራሱ ይህን ሃሳቡን ለህዝብ ይፋ ያድርግ የሚል ምላሽ በመስጠቱ ውዝግቡ መካረሩን ነው ምንጮቹ የገለጹት።

የምርጫ ቦርድ አቋም አላንቀሳቅስ ያላቸው ጠቅላይ ሚኒስትር አብይ አህመድ ተሰሚነት አላቸው ብለው የሚያስቧቸውን አምስት ፓርቲዎችን ቢሯቸው ድረስ ጠርተው ማነጋገራቸውም ታውቋል።
ለዚሁ ጉዳይ የተፈለጉት የኢዜማ የፖለቲካ ሊቀመንበር የሆኑት አቶ የሽዋስ አሰፋም ለቅስቀሳ ከመጡበት አሜሪካ በአስቸኳይ እንዲመለሱ መደረጋቸውንም ምንጮቻችን አረጋግጠዋል።

ጠቅላይ ሚኒስትሩ ምርጫ ቦርድ ምርጫውን ማስፈፀም ስለማልችል ይራዘም የሚል መግለጫ ሰጥቶ ሃላፊነት እንዲወስድ ያደረጉት ሙከራ በምርጫ ቦርድ እንቢተኛነት ሊሳካላቸው ባለመቻሉ፤ ከአምስቱ ፓርቲዎች ጋር ተወያይተው ፓርቲዎቹ ምርጫው ለሁለት አመት እንዲራዘም እንዲጠይቁና ይህንንም ለህዝብ ይፋ እንዲያደርጉ ከስምምነት መድረሳቸው ታውቋል።

ይሁን እንጂ ይህ ስምምነት በራሱ የኢዜማ አመራሮችን በሁለት ተከፍለው እንዲወዛገቡ ማድረጉ ነው የተሰማው።

አንዱ አካል ሁለት አመት የሚራዘም ከሆነ ህገ መንግስቱ ሊሻሻል ይገባል ፣ያ ካልሆነ ግን ለምንድን ነው መንግስት ሊወስድ ያልፈለገውን ሃላፊነት እኛ እንድንወስድ የሚደረገው በሚለው አቋሙ መጽናቱን ምንጮቹ ይናገራሉ።

ሌሎቹ አመራሮች በአንፃሩ ችግር የለውም ሃገሪቱ ያለችበት ሁኔታ ጥሩ ስላልሆነ የመንግስትን አቋም ብንደግፍ ይሻላል በሚል አቋም ላይ መሆናቸው ታውቋል።

ይህ አቋም በፓርቲው ውስጥ ትልቅ መከፋፈልንና ውጥረትን ማንገሱ ተሰምቷል።

ይህ በእንዲህ እንዳለም የፖለቲካ ፓርቲዎች የተፈራረሙት የቃል ኪዳን ሰነድ በምርጫ ቦርድና በጠቅላይ ሚኒስትሩ መካከል ሌላ የውዝግብ መንስኤ መሆኑን ነው የኢትዮ 360 የመረጃ ምንጮች የሚናገሩት።

የአማራ ብሔራዊ ንቅናቄ/አብን/ የፖለቲካ ፓርቲዎች የተፈራረምነው የቃል ኪዳን ሰነድ እየተከበረ አይደለም፣አባላቶቼ እየታሰሩ ነው፣ እስሩ ደግሞ ፖለቲካዊ ነው ሲል ያቀረበው ቅሬታ ዋና የውዝግቡ አጀንዳ መሆኑም ታውቋል።

ምርጫ ቦርድ የቃል ኪዳን ሰነዱ ስምምነት መከበር አለበት፣ ስምምነቱ የወጣው ለሚዲያ ፍጆታ ሳይሆን ህግን ልናስከብርበት ነው፣ አብን ያነሳው ጥያቄም ቢሆን በስምምነቱ መሰረት ሊስተናገድ ይገባል የሚል አቋሙን እንደያዘ ቀጥሏል።

ስምምነቱ ተደባብሶ እንዲያልፍ የሚፈልገው የዶክተር አብይ አስተዳደር በበኩሉ የፖለቲካ ፓርቲዎች የቃል ኪዳን ስምምነት የሚለውን አደባብሶ ለማለፍና ምርጫ ቦርድም በዚህ ጉዳይ ላይ ምንም ምላሽ እንዳይሰጥ ለማድረግ ጠቅላይ ሚኒስትሩ ጫና እየፈጠሩ ነው ይላሉ የመረጃ ምንጮቹ ።

በምርጫ ቦርድና በጠቅላይ ሚኒስትሩ መካከል የተነሱት ውዝግቦች ነገሮችን ወደ አላስፈላጊ አቅጣጫ ሊመራቸው ይችላል የሚል ስጋትንም አጭሯል።

በዚሁ ውጥረት ምክንያት በሁለቱ ወገኖች መካከል የተነሳው ውዝግብ የከፋ ደረጃ ከመድረሱ በፊት ውይይት ይደረግበት በሚል ቀነ ቀጠሮ መያዙንም ነው ምንጮቹ ለኢትዮ 360 ጨምረው የገለጹት።

1 COMMENT

  1. ምርጫ ቦርድ ምርጫውን አካሂዳለሁ ዝግጁ ነኝ ቢል፡፡ ፍትሃዊና ነፃ ምርጫ ለማካሄድ ምን ቅድመ ሁኔታዎች ተሟልተውለታል? ተፎካካሪ ፓርቲዎች ምን ያህል ነፃ ሆነው እየተንቀሳቀሱ ነው? ፓርቲዎቹ እራሳቸውስ ምን ያህል ንፁህ ናቸው? የአገሪቷ ሰላም ምን ያህል እምነት ተጣለበት? የህዝብ ቆጠራስ ሳይደረግ በምን ህዝብ ብዛት ተነስቶ ነው ምርጫ የሚደረግ? አረ ብዙ መስፈርቶችን መጥቀስ ይቻላል፡፡ ሁሉም ለእውንትና ለሀቅ ቢሰሩ ጥሩ ነው፡፡

    ምርጫው አይራዘምም የሚሉት ምን አስበው እንደሆነ ግልፅ ነው፡፡ ጥቅምና ተጠያቂነት ምን ያህል አይንን እነደሚጋረድ ይታወቃል፡፡ ስለዚህ ምርጫ ቦርድ ጥንቃቄ ቢያደርግ ጥሩ ነው፡፡ ምርጫ ቦርድ በጣም ተደራጀ ሲባል አልነበረ? በምርጫ ቦርድ ማሳበብ መፈለጉ ለምን እንደሆነ ለህዝብ ግልፅ ነው፡፡ ይልቅ ስለምርጫ ከመጨነቅ እውነት ለሀገርና ህዝብ የሚታሰብ ከሆነ ለምን ምርጫውን በማራዘም ጊዚያዊ የሽግግር መንግስት አይቋቋምም ከዛም ህገ መንግስትና ሌሎች አሳሪ ህጎችና ማሻሻል የሚቸልበት ላይ ፓርቲዎች ቢያተኩሩ የተሻለ ይሆናል፡፤ ዲሞክራያዊ ምርጫ ለማስፈን ሂደት ስለሆነ ምርጫው ቢካሄድ የሚል የአንዳንድ ፓርቲዎች አቋም እንደ 1997 ምርጫ ችግር ማስከተሉና ከዛም የባስ ነገር እንዳይፈጠር መጠንቀቅ ያስፈልጋል፡፡

    የተለያዩ የሲቪክስ ማህበራትና ህዝብን የሚወክሉ ተቋማት በዚህ ጉዳይ ላይ ለምን ዝማት እንዳሳፈኑ ግልፅ አይደለም? ምንስ እስኪፈጠር እየታየ ነው፡፡ ከ110 ሚሊዮን በላይ ህዝብ ላላት አገር ቸልታ ማሳየቱ የሚያሳስዝን ጉዳይ ነው፡፡

    ኢትዮጵያ ለዘላለም ትኑር!!

LEAVE A REPLY

Please enter your comment!
Please enter your name here

This site uses Akismet to reduce spam. Learn how your comment data is processed.