“በደንብ ተግቶ ሳይሰለች መሥራት ከተቻለ የሚፈለገው ውጤት ይመጣል፡፡” በኢትዮጵያ የዩኒቨርሲቲ መግቢያ ፈተና ከፍተኛ ውጤት ያስመዘገበው ተማሪ ብሩክ ዘውዱ

08/12/2011ዓ.ም

“ብሩክ ሥርዓት ያለው ልጅም ነው፤ ከፍተኛ ውጤት እንደሚያመጣም እንጠብቅ ነበር፡፡” አትሌት ሻለቃ ኃይሌ ገብረሥላሴ

በባሕር ዳር የአየለች ደገፉ መታሰቢያ ትምህርት ቤት የ12ተኛ ክፍል ብሔራዊ ፈተና የወሰደው ብሩክ ዘውዱ 645 ውጤት በማስመዝገብ በኢትዮጵያ ከፍተኛ ውጤት ያስመዘገበ ተፈታኝ ሆኗል፡፡

ከአማራ ብዙኃን መገናኛ ድርጅት ጋር ቆይታ ያደረገው ብሩክ ውጤቱ እንደጠበቀው መምጣቱን ነግሮናል፡፡ ዓመቱን በሙሉ ለብሔራዊ ፈተና ዝግጅት እንዲረዳው በቤተ መጻሕፍት ገብቶ በማንበብ፣ በመምህራን በግል የሚሰጠውን የድጋፍ ትምህርት በመከታተል፣ ትምህርት ቤትም የተለያዩ ፈተናዎችን በመውሰድ መዘጋጀቱን ጠቁሟል፡፡ “ከቤተሰብ እናቴ ሙሉ ድጋፏን በማበርከት በራሴ መንገድ እንዳጠና ታበረታታኝ ነበር” ብሏል፡፡ ጥረቱ በከፍተኛ ውጤት መታጀቡ እንደስደሰተውም ተናግሯል፡፡
“ማትሪክ የጉብዝና መለኪያ አይደለም፤ ከእኔ የተሻሉ ብዙ ተማሪዎች ይኖራሉ፤ የሥራ መለኪያ ነው፤ በደንብ ተግቶ ሳይሰለች መሥራት ከተቻለ የሚፈለገው ውጤት ይመጣል፡፡ ተማሪዎች ሁሌም ዓላማቸውን መዘንጋት የለባቸውም” የብሩክ ምክረ ሐሳብ ነው፡፡

የትምህትር ቤቱ ባለቤት አትሌት ሻለቃ ኃይሌ ገብረሥላሴ በስልክ በሰጠው አስተያዬት “ይህ ታዳጊ የ18 ወይም 19 ዓመት ሕልሜን አሳክቶታል፡፡ ታሪክ ነው የሠራው፤ ኮርተንበታል፤ ተማሪዎችን በማስጠናት አርአያ ልጅ እንደሆነም ሰምቻለሁ፤ የብሩክ ተከታዮች 13 የሚሆኑ ተማሪዎችም ከ600 በላይ ውጤት አስመዝግበዋል፤ ብሩክ ሥርዓት ያለው ልጅም ነው፤ ከፍተኛ ውጤት እንደሚያመጣም እንጠብቅ ነበር” ብሏል፡፡

ለቤተሰቡ፣ መምህራኖቹና ጓደኞቹም ጥሩ አርአያ እንደሚሆን ሻለቃ ኃይሌ ገብረሥላሴ ተናግሯል፡፡

መረጃው የ [አብመድ] ነው ::

LEAVE A REPLY

Please enter your comment!
Please enter your name here

This site uses Akismet to reduce spam. Learn how your comment data is processed.