እነሊቀ አእላፍ ቀሲስ በላይ መኰንን እስከ ነገ ጠዋት 3:00 ይቅርታ እንዲጠይቁ ቅዱስ ሲኖዶስ ገደብ ሰጠ

፤ጥያቄአቸው በተጀመረው የመሪ ዕቅድ ትግበራ ማሕቀፍ እንደሚፈታ ገለጸ

የጥያቄአቸው መነሻ በኾኑት በኦሮሚያ ክልል አህጉረ ስብከት፥ የስብከተ ወንጌል፣ የዕቅበተ እምነት እና የአገልጋዮች እጥረት… ወዘተ. ችግሮች ላይ ከምልአተ ጉባኤው ጋራ መግባባት ላይ ቢደረስም፣ ቀደም ሲል ቅዱስ ሲኖዶስ ውሳኔ የሰጠበት ጉዳይ እንደኾነ እያወቁ፣ “የክልል ቤተ ክህነት ጽ/ቤት እናደራጃለን፤” ማለታቸውና የቋሚ ሲኖዶሱን ክልከላ ተላልፈው የሚዲያ መግለጫ መስጠታቸው ስሕተት እንደኾነ ተገልጾላቸዋል፡፡

የክልል ጠቅላይ ጽ/ቤትም ኾነ የክልል ሲኖዶስ የማቋቋም ዓላማ እንደሌላቸው የገለጹት እነሊቀ አእላፍ ቀሲስ በላይ በበኩላቸው፣ በክልል ደረጃ የአህጉረ ስብከትን ጉዳይ የሚከታተልና የሚያስፈጽም፣ ከክልላዊ መንግሥታዊ አካላት ጋራ የሚያገናኝ፣ የሚያጋጥማቸውን መጓተትና እንግልት የሚያስወግድ ተጠሪ እንዲሠየም ፍላጎት እንዳላቸው ተናግረዋል፤ በኦሮሚያ ክልል ብቻ ሳይኾን፣ በሌሎችም ክልሎች ለሚገኙ አህጉረ ስብከትም እንደኾነ ጠቅሰዋል፤ “በአንዲት ቤተ ክርስቲያንና በአንድ ቅዱስ ሲኖዶስ እናምናለን፤ አንከፋፍልም፤ አንገነጥልም፤” ያሉት በጉባኤው ፊት የቀረቡት አምስት የኮሚቴው አባላት፣ “በክልሉ እየተባባሰ የመጣው የምእመናን ፍልሰት እና የመናፍቃን ወረራ ያሳስበናል፤” ብለዋል፡፡

በቤተ ክርስቲያን ሕግ እና የቃለ ዐዋዲ ደንብ ውስጥ የሚታዩ የአደረጃጀትና የአሠራር ክፍተቶችን ጨምሮ ለጥያቄአቸው መነሻ የኾኑት ችግሮች፣ በጠቅላይ ጽ/ቤቱ ሥር በተጀመረው የመሪ ዕቅድ ትግበራ ማሕቀፍ እንዲመለስ በግንቦቱ የርክበ ካህናት ቅዱስ ሲኖዶስ ምልአተ ጉባኤ መውሰኑን ቅዱስ ሲኖዶሱ የውሳኔውን ቃለ ጉባኤ በመጥቀስ አስታውሷል፤ በመኾኑም፣ የኮሚቴው አባላት በጠቅላይ ጽ/ቤቱ ሥር በተቋቋመው “የመሪ ዕቅድ አመራር እና ትግበራ ዐቢይ ኮሚቴ” ውስጥ እንደሞያቸው መሳተፍ እንደሚችሉም አስታውቋል፡፡

ከዚህ በቀር፣ በሥራ ላይ በሚገኘው ሕገ ቤተ ክርስቲያንና የቃለ ዐዋዲ መተዳደርያ ደንብ መሠረት፣ የአህጉረ ስብከት ተጠሪነት ለቅዱስ ሲኖዶስ እና ለመንበረ ፓትርያርክ ጠቅላይ ቤተ ክህነት ጽ/ቤት በመኾኑ፣ የተለየ ተጠሪ ይሠየም መባሉ፣ ሲኖዶሳዊ መዋቅሯን እንደሚጥስና ተገቢም እንዳልኾነ የምልአተ ጉባኤው አባላት አስረድተዋቸዋል፡፡

እነሊቀ አእላፍ ቀሲስ በላይ በማስከተል፣ “ጥያቄአችን በእናንተ በብፁዓን አባቶች ዘንድ ትክክለኛ ግንዛቤና ተቀባይነት እንዳያገኝ ለማበላሸት ተንቀሳቅሰዋል፤” ያሏቸውን መንፈሳውያን የአገልግሎት ማኅበራት ለመክሠሥ ቢሞክሩም፣ “ከዚህ ጋራ መያያዝ የለበትም፤” በሚል በምልአተ ጉባኤው ውድቅ ተደርጎባቸዋል፤ “የአንድን ብሔር መጠሪያ የክርስትና፣ ሌላውን የአረሚ ያደርጋል፤” ያሏቸውን መጻሕፍት ቢጠቅሱም፣ “የግለሰቦች ነው፤ ቤተ ክርስቲያንን አይወክልም፤” በማለት ተመልሶላቸዋል፡፡

በመጨረሻም፣ “ጉዳያችኹ፣ በቅዱስ ሲኖዶስ ተይዞ እየታየና መግለጫ እንዳትሰጡ ተከልክላችኹ እያለ ለምን ወደ ሚዲያ ለመውጣት ቸኮላችኹ፤ ለምን ሕዝቡን አሳዘናችኹ?” በማለት ምልአተ ጉባኤው ጠይቋቸዋል፤ “ጥያቄአችን በግንቦቱ መደበኛ ስብሰባ ራሱን ችሎ ያታያል ብለን ጠብቀን ስለነበረ ነው፤ አልታየልንም፤” በማለት መልሰዋል፡፡

የአደረጃጀትና የአሠራር ጥያቄአቸው በሲኖዶሳዊት ቤተ ክርስቲያን ሕግ እና ደንብ መሠረት ምላሽ እንደሚሰጠውና ለዚህም ከመካከላቸው ምሁራንና ባለሞያዎች የኾኑት በመሪ ዕቅድ ትግበራ ዐቢይ ኮሚቴ ውስጥ ተካትተው ሥራውን ማገዝና ማቀላጠፍ እንደሚችሉ የቅዱስ ሲኖዶስ ምልአተ ጉባኤ አቋሙን ገልጾላቸዋል፡፡ አያይዞም፣ “ሕግ ተላልፋችኋል፤ ቸኩላችኋል፤ ወደ ሚዲያ መውጣት አልነበረባችኹም፤ ይቅርታ ጠይቁ፤” በማለትም አዟቸዋል፡፡

ጉዳዩ ከጠበቁት በላይና ውጭ መጮኹን እነሊቀ አእላፍ ቀሲስ በላይ ለምልአተ ጉባኤው አባላት ማመናቸው ተነግሯል፤ ነገር ግን፣ የኮሚቴው አባላት ጠቅላላ ቁጥር 13 በመኾኑ፣ ይቅርታ ለመጠየቅ ከኹሉም ጋራ መማከር እንዳለባቸው በመግለጻቸው፣ እስከ ነገ ቅዳሜ፣ ጳጉሜን 2 ቀን 2011 ዓ.ም. ጠዋት 3፡00 ድረስ በምልአተ ጉባኤው ገደብ ተሰጥቷቸዋል፡፡

ቅዱስ ሲኖዶስ፣ ቤተ ክርስቲያን በተለያዩ አካባቢዎች በቀጣይነት እየደረሰባት በሚገኘው ተጽዕኖና ጥቃት ጉዳይ ወሳኝ አቋም በመያዝ አገልጋዮችንና ምእመናንን በነቂስ ለማነቃነቅ በጠራው በዚሁ አስቸኳይ የምልአተ ጉባኤ ስብሰባ የሚደርስበትን የጋራ ውሳኔ ለማሳወቅ፣ ለነገ ረፋድ 4፡00 ብዙኀን መገናኛዎችን መጥራቱ ተጠቁሟል፡፡

በ2007 ዓ.ም. ተሻሽሎ በጸደቀው ሕገ ቤተ ክርስቲያን ድንጋጌ፣ ቅዱስ ሲኖዶስ፣ የቤተ ክርስቲያን አስተዳደር እና አገልግሎት በቀኖና ቤተ ክርስቲያን መሠረት እንዲመራ ያደርጋል፤ የቤተ ክርስቲያንን አንድነት ያስጠብቃል፤ ያስከብራል፤ የቤተ ክርስቲያን ጉዳዮችን በተመለከተ ለጥፋተኞችና ለበደለኞች እንደ ጥፋታቸው መጠን ምሕረትን ይሰጣል፤ ይቅርታንም ያደርጋል፤ አስፈላጊም ከኾነ በቀኖና ይቀጣል፤ በአጠቃላይ፣ ቤተ ክርስቲያንንና የቤተ ክርስቲያንን ጉዳዮች በተመለከተ የመጨረሻ ውሳኔ ይሰጣል፡፡

ሐራ ተዋሕዶ

1 COMMENT

  1. ወዴት ሸርተት ሸርተት ነው፡፡ ዶሮን ሲያታልሏት ነው ነገሩ፡፡ የአስተዳደርና ሌሎች ጥያቄዎች ቢሆን በዚህ መልኩ መቅረብ አልነበረበትም፡፡ አዲስ አበባ የኦሮሚያ ነች ደጋግሞ የተባለበትም ነው ቄስ ነን ከተባሉት፡፡
    ለማንኛውም ዋናው ሲኖዶስ እየሄደበት ያለበት ሁኔታ ጥሩ ሲሆን ለወደፊቱም ያሉበትን ችግሮች በማስወገድ በመላ አገሪቷ በጠነከረ መልኩ መስራት አለበት፡፡
    አምላክ ኢትዮጵያን ይባርክ፡፡

LEAVE A REPLY

Please enter your comment!
Please enter your name here

This site uses Akismet to reduce spam. Learn how your comment data is processed.