በኢትዮጵያ ተጨማሪ 3 ሰዎች በኮሮና ቫይረስ መያዛቸው ተገለጸ

በኢትዮጵያ ተጨማሪ ሶስት ሰዎች በኮሮና ቫይረስ መያዛቸው መረጋገጡን የኢትዮጵያ ህብረተሰብ ጤና ኢንስቲትዩት አስታወቀ።

ኢንስቲትዩቱ በዛሬው ዕለት ባወጣው መግለጫ፥ በኢትዮጵያ የኮሮና ቫይረስ ያለበት የመጀመሪያው ሰው ከተገኘ በኋላ ከግለሰቡ ጋር ንክኪ የነበራቸውን ሰዎች ሲከታተል መቆየቱን አስታውቋል።

በዚህ መሰረትም ከአዲስ አበባ ከተማ አስተዳደር እና ከኦሮሚያ ክልል ጤና ቢሮ ጋር በመተባበር ከግለሰቡ ጋር ንክኪ የነበራቸው 117 ሰዎች ተለይተው የቅርብ ክትትል እየተደረገላቸው መሆኑ ተገልጿል።

ከዚህ በተጨማሪም ቫይረሱን ለመለየት የሚያስችል ምርመራ ለማድረግ ከግለሰቦቹ ናሙና እየተወሰደ መሆኑ ተመላክቷል።

ምርመራ ከተደረገላቸው እና ከመጀመሪያው ተጠቂ ግለሰብ ጋር የቅርብ ንክኪ ከነበራቸው ሰዎች መካከልም ሶስት ግለሰቦች በኮሮና ቫይረስ መያዛቸው መረጋገጡን ኢንስቲትዩቱ አስታውቋል።

ከእነዚህ ውስጥም ሁለቱ የ44 እና የ47 ዓመት ዕድሜ ያላቸው የጃፓን ዜጎች ሲሆን፥ አንደኛው ደግሞ የ42 ዓመት ኢትዮጵያዊ መሆኑ ታውቋል።

ሶስቱም ግለሰቦች በአዲስ አበባ ውስጥ የሚሰሩ እና ቫይረሱ ከተገኘበት የመጀመሪያው ግለሰብ ጋር የቅርብ ንክኪ የነበራቸው መሆኑን የገለጸው ኢንስቲትዩቱ፥ ከተጠቂዎች ጋር የቅርብ ግንኙነት የነበራቸውን ሰዎች የማፈላለጉ ስራ መጀመሩንም ጠቁሟል።

በአሁኑ ስዓት የመጀመሪያው ታማሚ በጥሩ የጤና ሁኔታ ላይ የሚገኝ ሲሆን፥ በለይቶ የህክምና መስጫ ማዕከል የቅርብ የህክምና ክትትል እየተደረገለት መሆኑ ተገልጿል።

በተያያዘ ዜና ከሳዑዲ ዓረቢያ የመጣ እና በኮሮና ቫይረስ ተጠርጥሮ ወደ ለይቶ ማቆያ በመወሰድ ላይ እያለ ያመለጠው ግለሰብ በቁጥጥር ስር መዋሉ ታውቋል።

ግለሰቡ የኢትዮጵያ ህብረተሰብ ጤና ኢንስቲትዩት ከፌዴራል ፖሊስ እና ከሚመለከታቸው አካላት ጋር ባደረገው ክትትል ነው በደቡብ ወሎ ዞን ለጋምቦ ወረዳ በቁጥጥር ስር የዋለው።

በአሁኑ ወቅትም ከግለሰቡ ጋር የቅርብ ግንኙነት የነበራቸውን ሰዎች የመለየት ስራ እየተሰራ መሆኑን ከጤና ሚኒስቴር ያገኘነው መረጃ ያመላክታል።

በመላኩ ገድፍ/ ኤፍ ቢ ሲ

LEAVE A REPLY

Please enter your comment!
Please enter your name here

This site uses Akismet to reduce spam. Learn how your comment data is processed.