የፌዴራል ጠቅላይ ፍርድ ቤት በ749 ሚሊዮን ብር ያስገነባቸውን መኖሪያ ቤቶች ለዳኞች አስረከበ

በፌዴራል የመንግሥት ሕንፃዎች ግንባታ ፕሮጀክት ጽሕፈት ቤት ተቆጣጣሪነት  የጋራ መኖሪያ ቤቶቹን የገነባቸው ተክለብርሃን አምባዬ ኮንስትራክሽን ኩባንያ ሲሆን፣ ኮንትራቱን ከጽሕፈት ቤቱ ጋር የተፈራረመው በታኅሳስ ወር መጠናቀቂያ በ2008 ዓ.ም. መሆኑ ተገልጿል፡፡

የፕሮጀክት ጽሕፈት ቤቱ ዋና ሥራ አስኪያጅ አቶ ተክለፃዲቅ ተክለ አረጋይ ለሪፖርተር እንደገለጹት፣ የተገነቡት ቤቶች 278 ናቸው፡፡ 140 ባለሦስት መኝታ ሲሆኑ፣ 138 ደግሞ ባለሁለት መኝታ ናቸው፡፡

ኮንትራቱ ሲፈረም 918,278,530 ብር በጀት የተያዘለት ቢሆንም፣ የተጠናቀቀው ግን በ749 ሚሊዮን ብር መሆኑን ዋና ሥራ አስኪያጁ ተናግረዋል፡፡ ብዙ ጊዜ ግንባታዎች በተያዘላቸው በጀት ሳይሆን ከፍ ባለ ወጪ የሚጠናቀቁ ቢሆንም፣ ጽሕፈት ቤቱ ባደረገው ጥንቃቄና ጥብቅ የሥራ ክትትል ግንባታው ከተያዘለት በጀት ባነሰ ወጪ መጠናቀቁን አስረድተዋል፡፡ ሕንፃዎቹ ሁለት ምድር ቤቶችና ባለ 18 ፎቅ ሲሆኑ፣ 244 ተሽከርካሪዎችን ማስቆም የሚያስችል ቦታም እንዳላቸው አክለዋል፡፡

ሙሉ በሙሉ ተጠናቀው ለዳኞቹ የተሰጡት ቤቶች 80 መሆናቸውን የገለጹት አቶ ተክለፃዲቅ፣ ቀሪዎቹ ቤቶች መጠናቀቃቸውንና ቁልፍና አነስተኛ የለቀማ ሥራ ስለቀራቸው ብቻ ሙሉ በሙሉ ማስረከብ እንዳልተቻለ ተናግረዋል፡፡ ሁሉንም በአንድ ጊዜ ማጠናቀቅ ያልተቻለው የቤቶቹ ማጠናቀቂያ ዕቃዎች ኤልሲ ተከፍቶ ከውጭ የሚመጡ በመሆናቸው፣ ተመሳሳይ ዕቃዎችን ከአንድ ቦታ በብዛት ማግኝት ስለማይቻል በተፈጠረ ችግር መሆኑንም አስረድተዋል፡፡

ግንባታውን ማስጨረስ በጣም ፈታኝ እንደነበር የተናገሩት ዋና ሥራ አስኪያጁ፣ በቅርቡ በነበረው ሁከት የሕንፃዎቹ መስታወቶች ከመሰባሰበር ጀምሮ የግንባታ ግብዓት መወደድና የሥራ ተቋራጩ ከደረሱበት የተለያዩ ችግሮች ጋር ተደማምሮ በጣም ትልቅ ችግር እንደነበር ተናግረዋል፡፡

ተቋራጩ ገንዘብ እንደሌለው በማስረዳት በልዩ ሁኔታ ብድር እንዲሰጠው ያቀረበውን ጥያቄ ባለመቀበል፣ ለራሱም ሆነ በሥሩ ለሚቀጠሩ ንዑስ ተቋራጮች ለሚፈጸም ክፍያ በጋራ አካውንት በመክፈትና ለተሠራው ብቻ በመክፈል ፕሮጀክቱ ጊዜ ቢወስድም፣ በአግባቡ እንዲጠናቀቅ ማድረግ መቻሉን ተናግረዋል፡፡ ኮንትራክተሩ በገባው ውል መሠረት ሊያጠናቅቅ ባለመቻሉ ጽሕፈት ቤቱ የውል ማቋረጫ ደብዳቤ ጽፎ የነበረ ቢሆንም፣ ከፍተኛ የመንግሥት ኃላፊዎች ጣልቃ ገብተው የተወሰነ ጊዜ ተራዝሞለት ያለ ተጨማሪ ክፍያ ሙሉ በሙሉ አጠናቆ ነሐሴ 30 ቀን 2012 ዓ.ም. እንደሚያስረክብ አስረድተዋል፡፡

ሙሉ በሙሉ የተጠናቀቁትን 80 ቤቶች ለ80 ዳኞች በዕጣ መሰጠታቸውንም ዋና ሥራ አስኪያጁ ገልጸዋል፡፡ ዳኞች ከቢሮአቸው በተጨማሪ ቤታቸው መዝገብ ወስደው የሚሠሩ ቢሆንም፣ ካለባቸው የቤት ችግር አንፃር በተረጋጋና በተመቸ ሁኔታ ሥራቸውን ማከናወን ይቸገሩ እንደነበር በተደጋጋሚ ሲናገሩ ይደመጡ የነበሩ ቢሆንም፣ የተሠሩት ቤቶች ግን ሥራዎቻቸውን በነፃነትና በምቹ ሁኔታ ሊሠሩ የሚያስችላቸው ቢሮ ሳይቀር ያካተተ መሆኑ ታውቋል፡፡

ሪፖርተር

LEAVE A REPLY

Please enter your comment!
Please enter your name here

This site uses Akismet to reduce spam. Learn how your comment data is processed.